Guwahati, Naitung:
Ka Liang Pyrshah ka Assam Jatiya Parishad (AJP) ha ka 30 tarik Naitung, ka la kyntu ïa ka Centre, ïa ka sorkar Assam, ïa ka Reserve Bank of India (RBI) bad ïa ki jaka ai pisa ban pynbna ïa ka jingsangeh shibnai ban siew ïa ka ram bad ka Equated Monthly Installment (EMIs) na ka bynta ki briew kiba shah ktah ha ki jingshlei um ha Upper Assam.
Ha ka kyrwoh ba la pynlait lang, u President ka AJP u Lurinjyoti Gogoi bad u General Secretary u Jagadish Bhuyan ki la ong ba ka jingshlei um ka la ktah jur ïa ka jingim bad ka kamai kajih jong ki lak ngut ki briew ha kylleng ka jylla. Ki la ong ba da ki hajar tylli ki longïing ki la duh noh ïa ki ïing ki sem, ki jaka rep, ki jingri jingdup, ki kam rit kam ria bad ki lad kamai ba kongsan, kaba la pynlong ïa ki ban don hapoh ka jingeh kaba jur ha ka liang ka pisa tyngka.
Ka seng ka la kyntu ïa ki bor ba dei peit ban pynsangeh noh ïa ka jingsiew ïa ka ram ïing, kali, kam khaïi, microfinance bad ki Self-help Group (SHG), ryngkat bad kiwei kiwei ki EMI, ym duna ïa ka hynriew bnai ha ki jaka ba shah ktah ha ka jingshlei um.
“Ka jingkit kaba khia ban siew ïa ka ram bank, ram ïing, ram kali, ram kam khaïi, ram Microfinance, ram jong ki kynhun ïarap ïalade (SHG), bad kiwei kiwei ki EMI ka la kylla long kaba ym lah ban shah ïa ki longïing kiba shah ktah ha ka jingshlei um,” la ong ka kyrwoh.
Ka AJP ka la dawa ruh ba ki nongshim ram kim dei ban shah shim bai siew slem, ka sut pynshitom ne kino kino ki jingpynshitom pisa ha ka por ba la pynsangeh.
Nalor ka jingïarap ban siew kylliang, ka seng ka la pan ïa ka jingïarap ba kyrpang na ka bynta ki nongrep, ki nongseng kam rit, ki SHG bad ki longïing kiba la duh ïa ka kamai kajih namar ka jingshlei um. Ka la tyrwa ïa ka ram kaba suk, ki ram ba lait bad ka jingpynlait na ka sut ban ïarap ïa ki briew kiba shah ktah ban sdang biang ïa ki kam kamai jong ki.
Ka seng ka la ong ba ka jingïarap ïa ki jingshlei um ka dei ban ïaid shabar jong ka jingsam ïa ki tiar jingïarap bad kynthup ïa ka jingïarap pisa ban ïarap ïa ki longïing ban ïoh biang ïa ki jingduhnong jong ki.
Kane ka jingdawa ka wan ha ka por ba ka Assam ka dang ïakhun pyrshah ïa ki jingma hadien ka jingshlei um. Watla ka um ka la hiar ha ki katto katne ki jaka, hynrei ka jingshlei um ka la kiew sha ka 78 ngut, katba palat lai lak ngut ki briew ki dang shah ktah ha kylleng ka jylla.
