M.M.Thaiang
Ka kong (L) Christina Lamin, ka longkmie kaba une u Nongthoh u ithuh bha. Ka kong Christina ka long kawei na ki longkmie bad ka Nongdawa kaba shirtrhem ban dawa ïa ka Thaiñ Labang – Nongphyllut, Nongphyllut Doloiship ban pynwan na ka Jylla Assam sha Ri Jaiñtia Meghalaya. Lada phai sha ka liang ka jingngeit, ka kong Christina ka long kawei na ki longkmie riewngeit Katholik kaba banyngkong jong ka shnong Mukroh bad kaba nyngkong ban wan pynbna ïa ka Khubor babha jong u Jisu Khrist ha ka shnong Kyarabon, Phlangmoorud bad Sarlong, Elaka u Doloi Nongphyllut.
Ka kong (L)Christina Lamin ka don san ngut ki khun shynrang bad kawei ka kynthei, kita u Prof. Dr. Henry Lamin, u Karnel, u Karmel, u Plasius, u Dr. Milinus bad ka kong Thelbina Lamin.
Baroh ngi ieid ïa la I Mei I Pa, kiba la pun, la kha, kiba la ri la sumar, kiba bsa, kiba bsiap, kiba pynheh pynsan, kiba pynnang pynstad ïa ngi kumba ngi long mynta, ïa kiba ieid bathoiñ da kaba tei ïa ki Mot, ki Mawbynna ha ki Lumjyngtep ne ha ki Tpep ban pynsahnam pynsah burom ïa ki, hynrei pat kine ki Mot bad ki Mawbynna ki shu sah hangto khlem da ai jingmyntoi ïa kiba bun ba lang bad ïa ka Jaitbynriew.
Haba phai sha kane ka bynta la dei ban ïaroh ïa ki Khun, ki Ksiew jong ka kong Christina Lamin ym tang ba ki tei da u Mot ne da u Mawbynna ban pynsahnam ïala I Mei, ki tei syndon da ka Skul kaba la ai Kyrteng Christ School Mukroh kaba ai jingmyntoi ym tang ïa kiba ha ïing hasem, ïa ka shnong ka thaw hynrei ïa ka Jaitbynriew hi baroh kawei bad khamtam eh ia ki Nongshong shnong jong ka Thaiñ Labang-Nongphyllut, Nongphyllut Doloiship, ki shnong kiba marjan ki bym pat don ki skul shnong kiba biang ne kiba heh Class ban ioh ïa ka jingnang jingstad. Ka jingdon jong kane ka skul, Christina Lamin, kaba shu thoh lyngkot “Christ School Mukroh” ka ïarap shibun ïa ki khynnah pule kiba wan na ki longïing kiba duk ki bym biang ka ioh ka kot,
Haba une u Nongthoh u la iohlad ban ïakynduh ïa ki Khun, ki Ksiew jong ka kong (L) Christina khamtam ïa u Prof. Dr. Henry Lamin, uba dei u khun phrangsngi jong ka kong Christ, u briew uba ïohi jngai, uba ñiewkor ïa ka jingnang ka jingstad, ka jingnangkot nangsla, ka jingnang thoh nangpule bad ka jingnang kheiñ nangdiah, uba sngewkhia mynsiem ïa ka jingsahdien jong ki briew ha ka pule puthi jong ki briew ka thaiñ Labang-Nongphyllut bad kumba ki sngi ka jinglong khynnah jong ka, ka im ka sah ha ka shnong Kyarabon, kumta ruh ka jingangnud jong ki khun jong ka ban tei ïa kane ka Skul (Christ School) ka long da ka jingthmu bad ka jingangnud bad plie lad plie lynti ïa ki khun nongkyndong kane ka thaiñ, ki shnong ki thaw kiba la shah ibeiñ da ka Sorkar naduh ba la pynkhlad jubor ïa kane ka Elaka u Dolloi Nongphyllut, kaba long kawei na ki Katar Doloi jong ka Hima bah U Syiem Sutnga ïa ka kham hadien ki Syiem Jaiñtiapur ba kin ioh ïa ka jingnang jingstad.
Ka Skul (School) ka la kiew ka kyrdan pule sha ka Secondary School bad une u Nongthoh uba dei ïaid lynti sha ka shnong lyngba ka shnong Mukroh, um ju pep ban wan jngoh ïa kane ka Christ School, ka skul ha kaba ki khynnah pule ki la nangbun nangbun na u snem sha u snem. Ka jingeh ïa ki khynnah pule kiba wan na ki shnong kiba jngai ka long ka Ïingshongwai naba ha Nongkyndong ki briew ki shna ïing tang ban biang ïalade bad halor kane ka jingeh kan jin da la bha ïa ki bahaïing hasem jong ka (L)kong Christina, lada don ka lad ban shna de sa ki Hostel ban ioh shong iohsah ki khynnah pule kiba na ki shnong ba jngai kiba wan pule ha kane ka skul.
Une u Nongthoh u ngeit skhem ba u Prof. Dr. Henry Lamin uba la long shisien ka sngi u MLA, u Cabinet Minister u bat ïa ka Education, u Pro Vice Chancellor, uba bat teng ruh ïa ka kam Acting Vice Chancellor NEHU, uba mynta u President ka Shillong Commerce College bad u Founder ka Skill Development College NEHU, Wahiajer un shimkhia ban thaw ki lad ki lynti ban shna ban tei de sa ki Hostel na ka bynta ki khynnah pule kiba na jngai kiba wan pule ha kane ka skul kaba ki la pynsahnam sahburom ïala I Mei, (kong Christina Lamin) ka skul kaban nangkiew na ka Secondary sha ka Higher Secondary bad hadun ka College ha ki snem ki ban dangwan bad ban nangpynkhraw shuh shuh ïa ka nam bad ka burom jong ka kong (L) Christina Lamin.
