Ha ka jingieit ym don nongshun, watla ka don bun rukom jingieit ha ngi ki briew. Ka don ka jingieit ïa ka kmie u kpa ïa ki hynmen para, ka don ka jingieit ïa ka lok (tnga) bad ïa ki khun ki kti bad ïa ka ïing ka sem, ïa ka shnong ka thaw ba ngi shong ngi sah. Ka don ka jingieit ïa ka Hima bad ka thaiñ ba ngi wan. Ka don ka jingsngew jan bad sngewieit ïa ka district bad ka Jylla la jong. Ka don ka jingieit ïa la ka rympei ba ngi shong ngi sah. Ka don ka jingieit ïa la ki para marjan marpa. Ka don ka jingieit ïa ki paralok parajor. Ka don ka jingieit ïa la ka khyndew ka shyiap, ka spah ka phew ba la buh ki kmie ki kpa. Ka don ka jingieit ïa la ka kur ka jait, ka don ka jingieit ïa la ka Meikha Pakha bad ka jingieit ka bym don jingtharai sniew ïano ïano. Ka jingieit kaba kham khraw ka long ïa U Blei nongthaw nongpynlong uba la ai ïa ka mynsiem bad ka jingim kaba dap ba kmen kyrhai ha kane ka pyrthei. Ka jingieit ka kham khraw ban ïa ka spah ka hajar jong kane ka pyrthei. U briew u bym don ka jingieit u long u bieit. Namar u bieit um tip bad um ithuh ïano ïano u leh kat kaba u sngewmon. Hynrei uba don jingieit para briew u ïoh jingkyrkhu na u Blei.
C. B. Iawphniaw
