Agartala, Nailar:
Ka jylla Tripura ka la lah ban shalan shabar ïa 1,000 kilo ka umngap ba la pynmih sha United Arab Emirates ha ka sien kaba nyngkong, la ong u Myntri ka Agriculture and Farmers’ Welfare u Ratan Lal Nath ha ka lah sngi U Blei.
U Nath u la pynbna ïa kane ka jingshalan ha ka por ba plie ïa ka jingïalang jong ka Agricultural and Processed Food Products Export Development Authority (APEDA) hapoh ka tnad khaïi pateng ha ka Hotel Polo Towers hangne.
U Myntri u la ong ba ka Tripura ka la kiew bha ha ka rep ka riang, ha kaba kumba 47,000 ngut ki nongrep ki trei mynta ïa ka jingrep kiba long naduh tynrai bad 26,000 hectare ki don hapoh ka kam rep kam riang.
“Shwa u snem 2018, kumba 2,000 hectare ka jaka ha ka jylla la pyndonkam na ka bynta ban rep ha ka rukom kaba long tynrai, mynta la pyndonkam 26,000 hectare na ka bynta ban rep ha kane ka rukom ha kaba ïadei bad ki jingthung jingtep bad 47,000 ngut ki nongrep ki don bynta ha kane ka rukom rep”, la ong u Nath.
U la ong ba ïa ka jingkit jong ka umngap la shalan shabar ri lyngba ka Farmer Producer Organisation (FPO) ryngkat bad ka jingïarap jong ka Agriculture and Farmers’ Welfare Department bad ka Horticulture Department.
“Hashwa, ngi la ju shalan ïa ka umngap sha kiwei pat ki jylla, hynrei ngim shym la shalan sha bar ri, kane ka dei ka sien kaba nyngkong, lyngba ka FPO, ba ngin shalan ïa ka umngap kaba paka sha UAE”, u la ong.
U Nath u la ong ba ka jylla ka pynmih ïa ki mar kiba long naduh tynrai kiba shisha bad kiba la pynskhem da ka jingkyrshan na ka APEDA bad ka sorkar pdeng.
U la ong ba u jait soh trun Queen Pineapple, Sabri Banana, u sohjew ba iwbih, u sohphan, shynrai bad sying, ki dei ki mar rep kiba la don ka jingdawa.
“Ka nongrim ba kongsan jong ngi ka dei ka rep ka riang. Sawphew phra percent na ka GSDP jong ka jylla jong ngi ka wan na ka rep ka riang”, la ong u Nath bad bynrap ba ka jingthmu ba kongsan jong ka sorkar ka long ban pynkiew ar shah ïa ka ïoh ka kot jong ki nongrep.
U Myntri u la ong ba la buh hakhmat eh ïa ki nongrep ha ki prokram ba la pynlong ha ki nongkyndong, ki jylla bad ki ri ka pyrthei.
Ka jingïalang jong ki nongthied bad ki nongdie ka la kynthup ïa ki jingïalang ba ïadei bad ka jingstad hapdeng ki nongthied bad ki nongdie. Ha kane ka prokram la ïashim bynta da ki nongthied nongpet nabar ri na New Zealand, Australia, Egypt, South Korea, Italy, Argentina, Germany, Greece bad Philippines.
Ki nongpynïaid ïa ka jingïalang ki la ïathuh ba 20 ngut ki nongthied nabar ri na ki khyndai tylli ki ri ki la ïashim bynta ha ka prokram. Hynrei u Nath u la kdew sha ki 21 ngut ki nongthied nabar ri ha ka jingkren jong u.
