I. R. Dkhar
Ha u bnai ïaiong mynta u snem, u Conrad K. Sangma, Myntri Rangbah badonburom, u la pynbna sha ki Kotkhubor kaba la mih ha ka 1tarik u Iaiong, 2026 ba ka Sorkar kan buh ïa ka LPG Bottling Plant ha ka Jylla Meghalaya. Tangba um ong ha kano ka jaka ha ka Jylla ban seng ïa kane ka LPG Bottling Plant. Haduh mynta, ngim tip namar ngim ioh khubor eiei la kan urlong ne em, lane lano ka Sorkar kan buh ïa kane ka LPG Bottling Plant. Kumba ngi sngewthuh, kane ka LPG Bottling Plant ka long ban thep bad pynbiang hi ïa ki Gas Cylinder, kiba pyndonkam ha kaba shet jingshet, ha ka Jylla la jong khlem da shañiah shuh ha ka Jylla Assam ne ha kiwei pat ki Jylla jong ka ri. Kane ka LPG Bottling Plant kan ïarap ruh shibun ïa ka jingdonkam ïa ka tyndong shet jingshet ne ka Gas Cylinder naba kane ka long kaba donkam haduh katta katta ha kane ka por mynta. Khlem kane ka tyndong, ki ïing ki sem kim lah ban shet jingshet. Lah ban ong ba ka ding ilektrik ruh lah ban pyndonkam, hynrei katno kane kan ïarap khamtam ka jingkiew ka bai ding ilektrik ha kane ka por lane kam long economical ne kaba kham myntoi ha ka jinglut jingsep.
Ha ki katto katne por ba la dep, la don ka jingong jong ki para rangbah ba ka Jylla jong ngi kan sa ioh noh ïa la ka jong ka jaka pynmih Gas Cylinder ha Umiam hajan ka Indian Council of Agricultural Research (ICAR), Ri Bhoi District. Katno ngi sngewkmen ban tip ba ka Jylla kan sa ioh noh la ka jong ka Karkhana Thep Tyndong Lyer Gas, kaba lehse kan ïarap shibun ha ka jingïoh gas ha ka por ba biang bad ka dor ruh kan kham duna. Hynrei kane baroh ka long tang ka ktien ki shu ong lehse ki ruh ki shu ïohsngew nangno nangno.
Kumba ngi tip, ka jingdonkam ïa ki Gas Cylinder ban shet jingshet ha kane ka por mynta ka long kaba donkam bha haduh katta katta. Ym kum ha ki por mynshuwa kaba ngi lah lah thang da ka dieng ne da ki skum kurat na ki karkhana ot-dieng. Ha kane ka por, ngim ïoh dieng thang shuh ne skum ban shet jingshet. Bad kam ïahap shuh hi ha kane ka juk mynta. Ka jingkiew dor ruh kaba nang kiew katba nang mih ki sngi. Ka jingbym ïoh ïa ki tyndong shet jingshet ha ka por ba biang, ka wanrah ïa ka jingjynjar jong ki longïing longsem bad teng teng, ki hap ban thied black ruh.
Te kum ki longïing longsem bad ki nongshongshnong jong ka Sor Shillong, ngi kyrpad ïa u Myntri Rangbah Conrad K.Sangma bad ka Sorkar jong u ban peit ha kane ka liang kaba donkam haduh katta bad lada ka Sorkar ka lah shisha ban seng ïa kane ka LPG Bottling Plant kan ïarap shibun ïa ki nongshong shnong ka sor Shillong bad ïa ka Jylla hi baroh kawei. Ha ka juh ka por kan long ruh kum ka lad ban ai kam ai jam ïa ki briew la jong bad ha ka juh ka por kan ïarap ïa ka jingkyrduh Gas kaba hap ban shañiah ha kiwei pat ki Jylla kum ka Assam.
