Ka Nongnah ka dei ka shnong kaba la ker sawdong da ki riatbah (Natural fort) lait noh na shaphang shathie lam sepngi ka lynti ban leit sha Ranikor. Ka long ka shnong kaba itynnad bha ha ka scenery kaba long kum ka miej (Tableland). Ka Nongnah ka kynthup ïa ki hynñiew tylli ki kyntoit shnong. Na neng sha rum la shim nyngkong ka dei ka shnong Nongktieh, kaba ar ka Nongnah kaba lai ka Domsohkhai, kaba saw ka Mawending, kaba san ka Nongkdait – Nongdum, kaba hynriew ka Nongkdait – Nongtwah bad kaba hynñiew ka dei ka shnong Thangrai. Ka shnong Thangrai ka la shah wiangding ha ka sorkar phareng la ïathuh ki riew tymmen kiba la khlad noh na kane ka sla pyrthei.
Ha tynrong thiap Bamon pat ka dei ka jaka kaba ka Nongnah ka la ïeng ban ialeh thma pyrshah ïa ka sorkar phareng ha ka por u Syiem Sngap Sing syiem ka hima Maharam. Ka Nongnah mynta ka la lait surok kali naduh Mawkyrwat lyngba ka Nongnah shaduh ka Ranikor. Ka Nongnah ka long ka shnong kaba ki briew ki im da ka rep ka riang ha ki sawdong sawkun ki lyhuh bah jong ka shnong. Ka long ka shnong kaba pawnam bha ha jingbang u Sohñiamtra. Ka Nongnah ha syndah u Lum Iawpaw uba ker phang shathie ka ri Bangladesh. Mynta pat ka Nongnah ka la paw kum ka shnong ki Tourist na ka jingdon ki krem eh shrong kum ka Krem Mawtynhiang ha u Lum Iawpaw. Nangta ka jingdon ka Pung sum shrieh ha shiteng riat kaba long ka pung sum ne Natural Swiming Pool kaba khring bha ïa ki nongwan jngoh kai na kylleng ka Jylla bad na shabar ka Jylla ruh. Ka jingdon de kawei ka jingkieng jri (Ladder) harum ka shnong Thangrai. Ka Nongnah ka long ka jaka kaba mih bha u Tiew Rakot (Pitcher plant) ne u Tangniangriang ba ki khot ha ka ktien shnong. Ka Nongnah ka don ha South West Khasi Hills District ka Jylla. Ka jngai tang kumba 30k.m na Mawkyrwat ka Headquarter jong ka District.
C. B. Iawphniaw
