Shikur ka dei kiba ai kajuh ka jait ka kynja. Haba ïapher ka kyrteng kim dei shikur. Kum ka nuksa ka kur Kharkongor baroh kiba shim ïa kane ka kyrteng (Title) ki ïadei na kajuh u Thawlang ka ïawbei. Ka kur Iawphniaw ruh kumjuh baroh kiba ai jait Iawphniaw ki ïadei shikur ki wan na kajuh ka Thawlang ka ïawbei, wat la ïapher u Symbai, ha ka longdoh longsnam.
Ha kano kano ka kur ne ka jait ruh ka don beit ka jingïapher ha u symbai, namar ngim lah ban ïa shong-kha para kur. Ngi ïa shongkha bad kiwei ki kur. Watla ngi ïa dei kajuh ha ka jait ne ka kur hynrei u symbai te ka don beit ka jingïapher. kane kein kata ka jingïadei shikur ha ngi ki khun Khasi – Khara. Shikur ka mut kajuh ka jait. Shipara trai pat ka dei tang na ujuh u kpa haba ïapher u kpa ym dei shuh shipara trai watla dei kajuh ka kmie ruh. Hynrei lada ïapher ka Kmie ujuh u kpa ki dei hi shipara trai lyngba u symbai ka longdoh longsnam.
Ngim dei ban sngewthuh bakla ïa kane namar ka dei ka Blood Relation – ship ym ka kyrteng ka jait ne ka kur. Ngi dei ban da wad ïa ka tynrai lyngba ka hiar pateng ka longdoh longsnam. Namar don bun ki kynthei kano kano ka jaitbynriew ruh kiba ioh tnga arngut laingut haba la shah ïehnoh ha u tnga uba nyngkong kum ka jinglong briew ngi don ka hok ban shim tnga biang haba dang biang ka rta. Kum ban shu ong noh ka kynthei briew ka ioh tnga ïa u Negro ka ioh khun iwei bad u ïehnoh ïa ka.
Te ka ioh tnga biang ïa u khar Bihar ka ioh khun biang iwei bad hadien u phet noh. Ha kaba lai sien ka ioh tnga biang ïa u para doh para snam bad ka ioh khun biang sa arngut. Te kine ki khun na kajuh ka kmie hynrei ba ïapher ki kpa kim ïa dei shipara trai, ki dei shipara arkpa lai kpa keiñ. Shipara trai ki dei beit tang na ujuh u kpa ioh phi sngewthuh bakla.
C. B. Iawphniaw
