Raphael Warjri
Naduh ba la soi ïa ka soskular ban iasnoh sha ka Ri India, ka Assam ka la shim kabu ban kam trai ïa ka Ri Khasi bad Jaiñtia kum ka raijbah (district) hapoh ka jyllabah Assam, hynrei ki khlem ler kam namar ba ki rangbah Khasi ha kata ka por ki long kiba shlur bad shemphang, khamtam u Bah Joy uba ïaid da ka lynti ban pynïadei ha ka jaka ban aireng. Hynrei kiwei kiwei ki rangbah na ka Federation of Khasi States kim bhoh ban leit pynïadei bad ka Assam, namar ki la dep sakhi ba katno ki dkhar Assam ryngkat ka sorkar katno ki la knieh ïa ki jaka puta bad ki jingdon jingem jong ki Khasi na ka daw ba ki ioh mynsiem na ka sorkar India tang mar ïa ioh laitluid na ka Sorkar Bilat. Da shisha ka sorkar Bilat bad hadien la shimti da ka sorkar India ban thombor ïa ka Ri Khasi Jaiñtia, bad kaba tyngkreiñ eh dei ynda la jop ban ioh la ka jylla rilum Meghalaya. Ki dulir ba kongsan ba dei ban khmih ïa u pud usam la rah la rong noh da ki dkhar Assam sha Dispur. Byllai ki jaka puta ba kynsai ha nongbah Shillong ki dei kiba la kurup nongkynti da ki dkhar Assam bad Bangla ryngkat ki nongkhaiï khamtam ki dkhar Marwari. Kumta ba ki jaka kum ka Lawjynriew la kylla Motinagar, ka Laban la kylla Vishnupur, ki bynta jong ka Laitumkhrah la kylla Bijni, Bhagyakul bad kumta ter ter. Kaba palt liam ka jaka ba la shah kurup dei ha ki shipai ba la ker sawdong ia ka nongbah Shillong khlem lait shuh tang shi saphit ruh. Na Lummawbah sha Lawsohtun shilynter haduh khap mylliem la syrtap da ki kut shipai baroh arliang surok. Na Laitkor sha Madan ryting shilynter haduh mawshbuit la syrtap ki len shipai. Na Umpling sha Nongmynsong markhap Mawpat ruh kynrei ki len shgipai. Ka Rangmen bad kiwei kiwei ki jaka ba marjan ruh la satah da ki len shipai. Kine baroh ki ker sawdong ïa ka nongbah Shillong.
Jar la katta ka Ri Khasi ka dang ïaksaid ban lait na kaba shah thombor ha ki bor ba na shabar khamtam na ka jylla Assam kaba la kynshoit ïa baroh ki jylla rilum ha ka thaiñ, naduh ki Naga, Mizo, Manipur bad mynta sa ha khappud Arunachal Pradesh, lait noh ka Tripura kaba la tyllep da ki mynder na Bangla.Kumta shilynter taid ka Assam ka thaw lad ban kynshoit ban knieh ïa baroh ki jaka khappud jong ki jylla rilum, kum ka rakot bam briew. Ha rynsan synshar ka Ri India la kdup ïa kine ki hynñiew tylli ki jylla kum shipara ha kawei ka thaiñ jong ka Ri India. Hynrei na ka por sha ka por ka Assam ka la leh heh kum ka hynmen rangbah ban sympat ïa baroh ki riewlum. Ki Naga, Mizo, Manipur bad mynta ki Arunmachal kim ailad bad ki aireng pyrshah wat lada dei ban ïa iap ia mynsaw ruh. Dei tang ka jylla Meghalaya kaba shah jem rngiew ha ka Assam ba la long ka raibi naduh ba la shah kñieh noh marshiteng ka Hima Jaintia ka ba la kynthup sha ka Karbi Anglong. Kine ki kam lehheh jong ka Assam ki dang ïai bteng shilynter lyngba ki ryta ba ym lah shuh ban ñiewtang, namar ba la jyllei than ki jingjia kiba shah thombor ki paidbynriew Khasi ha ki dkhar Assamia. Ka jingshah khñiot ka Ri Khasi ka long na baroh sawdong pud jong ka jylla, na sepngi ha la ki parajylla lajong ki Garo, na mihngi ha ki Karbi, na shathie ha ki dkhar Bangla bad kaba shyrkhei tpalt liam na shatei da ki dkhar Assamia.
Dang shen kaba shynna ka dei hadien kaba ïakhih ka Khasi Students’ Union (KSU) kaba la pur kylleng ban shah lynsher ha ki dkhar kiba la khleh khawlang ha ka jaitbynriew Assamese. Ki trai bynriew Tai Ahom kim sngewtynnat ïa ka rukom leh jong ki dkhar Assamia, khamtam ba ki dei kiba la khleh khawlang bad ki dkhar Bangla, Bihari bad kiwei kiwei ki dkhar na dewbah India. Ka la don ruh ka jingshah kynnoh ba don da kiwei pat ki atiar barieh kiba thmu ban lynsher ïa ka jylla Meghalaya, na ka daw ba ym ioh ban thied jaka bad ba ym ioh ban tih ïa ki marramew ka mariang (natural resources). Kumta la suba jur ba ki riewshimet na sha bar jylla bad na jylla ki la ïa khleh lang ban byrsieh ha ka kynhun jong ki dkhot KSU ban leh ki kam khyllah tang ban shah kynnoh ka KSU. La kynnoh ba ka shlem swar-ri ka Ri India (central intelligence) ka lah ban phong ïa ka dur bula ban pynkhie wahleng ïa ki dkhot ka KSU, ban shim kabu na ka bynta ban pynshong syier ïa ka jylla Meghalaya. Ka jingsngewthuh ba na sha lyndet da ki riew shemphang ka long ba ka don ka jingpyrshang ban pyntroiñ ïa ka jylla khnang ba yn lah ban shimti ka sorkar kmie da ka ba pynjiari da ka Atiartrei (article) 370 kumba ju angnud ka seng VPP. Ha kata ka por ka lah ban pynduh noh ïa ka Dorbar Thawaiñ Dalariti (district Councils) ha jylla bad lah ban pynkylla ïa ka rukom synshar da ka ba shu thombor beit da ka sorkar kmie. Ha kata ka rukom, ka lah ban poi shaduh u pud ba yn sa tynruh ban tih uranium ruh, namar ba ka Ri India ka donkam palat ïa une u marramew na ka bynta ban shna pynkhreh ïa ki shlem atiar pynbthei (nuclear arsenal) ha ka nam ban ïada ïa ka Ri India baroh kawei.
Katba dang ïakhih ka KSU bad kiwei kiwei ki seng banbor (pressure group) ha ryngkat ka jingpyrshah jong ka sorkar jylla lada dang sngur shisha ka jingthmu ban ïada ïa la ka Ri bad Jaitbynriew, katta dang don jingkyrmen bad yn dang ioh jingshngaiñ. Ki longshwa manshwa ki la seng nongrim ka ba skhem ba ka la shong tynrai ruh ha ka khep ba ioh jylla rilum ba ki jaka puta ha Ri Khasi ym lah ban kniehbor ki ba nabar wat ka sorkar kmie ruh namar dang don ki atiar aiñ kiba skhem ba la pynkhreh da ki rangbah ba ïakhun jylla Rilum bad kumjuh ruh ba ka Atiar Kubur Ïasnoh Ri India (Instrument of Accession) ruh dang lah ban pynim, lada don ki riewsaid aiñ ki ba shitrhem ban ïada hok ïa la ka jaitbynriew. Kane ym dei kaba tieng kohtympan, hynrei ka don ka syrwet ba lah ban urlong kumba long ïa ka Ladakh ha jylla Kashmir.
