Chennai, Nailur:
Ha ka sienjam kaba kongsan, ka tnad kit mar jong ka Tamil Nadu ka la rai ban pynduh noh ïa ka rukom ai ïa ki card ba la buh chip na ka bynta ka Registration Certificate (RC) jong ki kali bad ka licence ñiah kali. Ha ka jaka jong kata, yn shah ïa ki trai kali bad ki nongbat laisen ban shim ïa ki kot ki sla kiba la soi da ka Digital. Kane ka jingthmu kan treikam naduh ka 15 tarik Nailur, u Myntri Rangbah ka jylla u C Joseph Vijay u la pynbna hapoh ka Assembly ha ka sngi Balang haba ai jingkren katkum ka Rule 110.
Kane ka sienjam la khmih lynti ba kan pynbha ïa ka jinglong khuid, ban pynduh ïa ka jingpynslem ban sam ïa ki kot ki sla sha ki nongpyndonkam kali bad ban tehlakam ïa ka bamsap ha ki Regional Transport Office (RTO). Ki Tout, ki nongdie kali bad ki skul ñiah kali bunsien ki bat ïa ka RC tynrai bad ka licence ñiah kali jong ki nongaplai, la kynnoh ba haduh ban da siew.
Ki kot ki sla Digital kin don ki QR code bad ki jingsoi Digital, kaba ailad ïa ki bor sorkar, ki pulit pynïaid kali bad kiwei kiwei ki bor pynjari aiñ ban pynshisha ïa ka jingshisha jong ki da kaba pyndonkam ïa ki tiar ba la bat da ka kti.
Ki heh jong ka tnad kit jingkit ki la ong ba ki nongpyndonkam kali ki lah ruh ban ïoh ïa ki kot ki sla ba la download ba la pynkylla sha ki Physical Card da ka jinglut jong ki hi, da kaba bynrap ba kin dang bteng ban shah kheiñ kum ki kot ki sla kiba biang. Mynta, ki nongaplai ki shah shim dor T.250 na ka bynta ki RC bad ki licence ba la buh chip.
Lyngba kane ka jingleh, ki nongthied kali thymmai kin lah ban shim ïa ka Digital RC ha kajuh ka sngi ba la dep pynrung kyrteng. Kumjuh ruh ki nongaplai kin lah ban shim ïa ka licence ñiah kali jong ki ha ka sngi ba ki pyndep ïa ka test ñiah kali. Kane ka jaka kan long ruh ban shim ïa ki Digital Copy lada ki kot tynrai ki jah, la ong u Myntri Rangbah.
Ka jylla mynta ka pynmih kumba 30 lak tylli ki Smart Card ba la buh chip man la u snem. Kane ka kynthup kumba 20 lak tylli ki RC na ka bynta ki kali kiba dang shu rejistar bad die biang, bad kumba 9 lak tylli ki licence ñiah kali kiba thymmai.
U heh jong ka tnad kit mar u la ong ba ka lad ban ïoh ïa ka Smart Card kaba paw kan dang sah haduh katto katne por. “Ngin sa pynsngewthuh kham bha ïa ki nongaplai ba ki kot ki sla ba la shim da ka Digital ki long kiba biang. Hadien katto katne por yn sa sangeh noh ïa ka jingai ïa ki Physical Card,” ong une u heh sorkar.
Haba kdew ïa ki Smart Card ba la buh Chip ba la pynmih ha TN naduh u snem 2015, une u heh sorkar u la ong, “Mynta, ki jingthut ha kaba pynmih ïa ki Smart Card RC ki wanrah ïa ka jingpynslem bad pynkiew ïa ka jingkitkhlieh ha ka liang ka jingpynïaid, katba ki pynlong ïa ki nongaplai ban ap kham slem.”
