Ka khubor jong ka jingthmu jong ki katto katne ngut ki MLA ka United Democratic Party (UDP) ban ryngkang noh sha ka Bharatiya Janata Party (BJP) ha kine ki sngi ka la her sted bad saphriang bha, watla na ka liang ki nongïalam ka UDP bad ki MLA ki la kyntait ïa kane. Lada kine ki khubor ki kylla long shisha, la thikna ba pynswai syndon ïa kane ka seng, kaba la ju tip ruh kum kawei na ki seng riewlum kaba khlaiñ bha ha rilum Khasi bad Jaiñtia. Ïa ka UDP la seng ha u snem 1997 da u Bah EK Mawlong (bam kwai ha dwar U Blei) bad dei ha u snem 1998 ba u Bah BB Lyngdoh (bam kwai ha dwar U Blei) u la shimti kum u Myntri Rangbah ba nyngkong ka UDP.
Ha manla ki ilekshon, ka UDP ka ju jop bun ki MLA bad bunsien ka don beit ha ka Sorkar Synrop bad ha u snem 2023 ruh ka la ïoh ïa ka jingjop kaba heh, haba haduh 12 ngut ki MLA ka la ïoh. Hynrei kumba ka long mynta, hato ka UDP kan stait noh khamtam lei hadien bala mih ki khubor jong ka jingthmu leit ïasoh BJP jong ki MLA. Hato kane ka seng kaba ju tip baroh shi katta kum kawei na ki seng riewlum kaba khlaiñ hapoh ka Jylla, kan jah kyrteng noh. Tang ka por hi kan sa batai. Dang shen u nongïalam ka UDP Bah Paul Lyngdoh u la ong ba ka party jong u (UDP) kala nang ngam hadien ba weng noh ïa u na ka Kynhun Myntri ka Sorkar Jylla. U la ong ruh ba ka long kaba sngewsih shibun ba ka party shisien ka por kaba ïasoh bad ka jingïakhih Hill State kala mad mynta ïa ka jinglong ban hiar ha ka jingdon ki MLA sa tang uwei ne ar ngut.
Hato kane ka jingpynpaw jong u Bah Paul, kan dei lypa ka dak ba ka lieng jong ka UDP ka la sdang pei thliew bad ba kam slem shuh ban ngam. Kat kaba ngi lah ban sngewthuh ka long ba kane ka jingsaphriang ki khubor ba ka la don ka jingthmu ban ïasoh BJP jong ki MLA UDP, ka la dei naduh ka sngi ba ki la leit ban ïakynduh ïa u Myntri ka tnad Kam Pohïing ka Ri u Amit Shah ban ïakren halor ka mat FCRA bad kiwei ki mat kiba bun kiba ktah hapoh ka Jylla. Watla ym pat lah ban pynthikna pura halor kane ka khubor, hynrei ki jingpynpaw na ki katto katne ki MLA ka UDP ka la thew shata bad khamtam lei lei hadien ka jingpynpaw sa jong u Nongïalam ka NPP u Bah Sniawbhalang Dhar ba ki la don katto katne ki paralok UDP kiba la ong ha u ba ki kwah pynïasoh BJP, imat kan lam beit sha kata ka jingthmu. Ngim tip shuh kaei ka ban jia ïa kane ka seng ha ka ilekshon MP shiteng samoi ka ban sa long shen. Ha ka ilekshon MP kaba la long ha u snem 2024 ruh ngi la sakhi ba ka UDP ka la shah kyntait ha kaba u kyrtong jong ka um shym la lah ban khie khlieh satia, watla kane ka seng ka la jop haduh 12 ngut ki MLA ha u snem 2023.
Watla ki jingïakren hapoh ka UDP ki pynpaw ba baroh ki 12 ngut ki MLA ki long skhem bad tylli kawei hynrei ki dak ki shin kiba paw pat shabar kim long kumta. Lada kine ki pynïasoh pura bad ka BJP, ka aiñ kam khang lad. Bad lada ki leit, ka jingdon MLA ka BJP ka lah ban kiew na ki 2 ngut sha ki 10 ne 11 ngut. Hynrei kine baroh kiei kiei kin sa shai bad paw pyrthei tad ynda la dei ka por, la kan long kaba shisha ne ba kan dei tang ka khubor pynphriang jongno re jongno ban myntoi seng saiñpyrthei.
