( W. Liningstar. Lyngdoh )
Tymmenbasan – Balang Presbyterian Pohkseh
Ka jingsngewrem haba ki Balang Khristan kiba aiti ha ka jingieit bad jingsuk U Blei, ki kiew ïinglieh ïingsaw ban pynksan ïa ki jingsngew briew ha ka jinglong doh. Katno ka jingsngewlehrain haba la pynmih ha ka kot Khubor phareng ‘Shillong Times’ kaba 16th September,2026 – front page kaba ïadei bad ka jingpynmih hukum ka Meghalaya High Court ne ïing Bishar Meghalaya (IBM). Ka IBM ka la pynduh pyndam ïa ka hukum Sorkar lyngba u Deputy Commisioner, East Khasi Hills District, Meghalaya kaba khang ïaka jingsharai ïaki para mynsiem bad jinglehniam mane Blei ha ka Balang Presbyterian, Mawkhar. Kane ka hukum ka dei ruh ïa ka jingsynshar Balang bad jingshakri Blei ba kynja mynsiem (ecclesiastical) da ki briew jong U Blei kiba la khot sha ka kam ba kyntang ka jong U. Ka IBM ka la kyntait ruh ïa ka ‘Jingtip Daw-pyrshah’ (Show – cause notice) ïaka Balang Presbyterian, Mawkhar. (BPM). Ka Balang BPM kan pynïaid ruh ïa ka kam Sharai Balang bad ki para mynsiem kin ïoh bynta na ka jingbsa na ki Sacraments Bakhuid.
Sngewtynnad ba ka IBM ka sngewkhia ïa ka jingshakri Blei Bakhuid bad Bakyntang ryngkat bad ka jingsuk Blei kaba palat ïa ki jingshemphang baroh. Ki bor Sorkar ki dei ban husiar ban ïada ïa ka jingpynwit ïa ka jingsuk Blei ba kynja mynsiem. U Jisu U ong” ïaka jingsuk nga ïehnoh ha phi, ïa ka jingsuk jong Nga, Nga ai ma Nga ha phi ym kumba kata ka pyrthei ka ai.”-Ioanis 14 : 27. Ka IBM ka ban bha ba ki bor Sorkar ki dei ban pynïasuk haba don kano kano ka jingïakynad bad pher jingmut da kaba pynksan ha la ka jong ka jingsngewthuh.
Haba pyrkhat kaei ka daw ba mih ka jingïashun-ïapen hapdeng ki khun ki Balang Khristan? – ka daw kongsan dei ka jingsngew sarong ha ka jingsngewstad, jingsngew donbor bad jingsngew dap kyrhai ka spah. U Trai U kren ha u Jeremaiah 9 : 23 – 24 “Wat ai ba u riewstad un sarong ha la ka jingstad, lymne uba khraw bor un ym sarong ha la ka bor, u riewspah to un ym sarong ha spah jong u”. Ha ka jinglong briew, jan baroh ngim lah lait na ka jingsarong ha ki bynta bapher bapher. Ha kine ki sngi, kane ka dei ka challenge ïanga bad ïa phi. Ka Ktien u Blei ka kren skhem ba ngin jop ïaka bor u soitan jong ka jingsarong. U kren ruh ba ïa jinglong barim “Pynbha ïa ki lynti jong phi bad ki jingleh jong phi”( Amend your ways and your deeds) JER 7: 3 ba ngin ioh shongneh bad la U Trai ha ka Hima jong U junom la junom.
Ka IBM ka la sngewkhia halor ka jingjah Pisa U Blei kaba palat klur. Kane ka dei ka pisa ba la pynkyntang ïa ka ba mih (Amount) baroh bad kam dei ka pisa Balang. Ka dei ka Pisa U Blei. Ka pisa Bakhuid bad ba Kyntang. Lada la kum shim, pynphai noh – U Blei Un map. Wat pyndonkam bakla ne leh lutphut haka jingsarong ha ka jingsngew don kyrdan kaba pynhiar ïaka jingsngewrit kaba U Trai Jisu U la hikai. Ka Proberb u Solomon 10: 9 haka Ktien U Blei ka kren shai ba uta uba ïaidbeit u ïaid khlem sheptieng ha ka jinglong khuid hynrei uta uba ïaid kdor ne kynriang, un hap ha ka jingpynrem bad yn shem ïaka. Ka Pisa U Blei ka dei kaba khuid bad bakyntang kaba la nohsynñiang da ki paramynsiem ban ai sha ka kam U Blei namar ki jingkyrkhu ki jong U kum ka riew kynthei kaba la noh ka damli nakajingkyrkhu baka la iohdiang na U Blei. Ka Pisa U Blei.
U Jisu U la pynpaw ïaka jinglongrit ha ka kamra kaba haneng ha kaba U la shim ïaka towel bad tawah ha ka kti, U da dem bad sait ïa ki kjat ba jakhlia jong ki Synran kaba pyni ïaka bor ka akor ba U lup ha ka long rynïeng jong U ryngkat bad ka jingsngewrit kaba palat liam – Ioan. 13 : 1-5 . Ka kynhun nongbud ka jong U Blei bad U Trai Jisu kaba kynthup naduh ki Pastor, Tymmen Basan, Dkhot Committee bad ki parabangeit Khristan baroh to phin ïakup ïa jingsngewrit ba kynja mynsiem naba U Blei U ïaleh pyrshah ïa kiba sngewkhraw. Hynrei ïa ki basngewrit U ai ka jingaiei – pule I Petros 5: 5.
Ai ba ka jingsuk U Khrist Jisu kan synshar ha ki dohnud jongnga bad jong phi kum ki khun kiba la siewspah kyrpang ïa kiba la jied kiba khuid bad kiba ieit eh jong U Blei ban ïaishah para mangi bad ban ïa map iwei ïa iwei. Peit ruh Kollosai 3: 12 – 16. To ngin trei naduh ka mynsiem ha ka jingkhuid ka dohnud da kaba sheptieng ïa U Trai. Kum ki Nongïalam Balang Presbyterian to ngin kup noh ïa jinglong thymmai ban pynkhuid noh naki mokotduma bad ban kiar na kiba kum kita. Kane ka long ruh ïaki Balang Khristan Baroh.Kum U Tymmen Basan ba la ïaw ka karta ha ka Balang Pohkseh, Presbytery Laitumkhrah, Synod Pdeng, KJP Assembly nga kloi ban ïashong bad ban ïamir jingmut sha ka jingïasngewthuhlang ban ïa long biang kawei da kaba klet noh ïa kiei kiei kiba rim kiba la wan lyngshop ha ka Balang Presbyterian Mawkhar.
U BLEI UN BTIN LYNTI SHA KA JINGJOP ïA KA JINGTHMU BABHA
