Ka Lajong bad ka Jingïaid lynti jong ki Pateng ban kyntiew ïa ka jingïalehkai phutbol ha ka jylla Meghalaya
Ka jingïakren kaba dang shen halor ki academy phutbol bad ka jingpynkyntiew ïa ki samla ha Meghalaya ka ai ïa ngi ka lad kaba kongsan ban phai dien halor nangno ka phutbol ha ka jylla jong ngi ka la wan, hangno ka ïeng ha kine ki sngi, bad shano ngi ngeit ba ka dei ban leit ha ki por ki ban wan.
Na ka bynta ka Shillong Lajong, ka jingpynkyntiew ïa ki samla kam ju long tang ka kam kaban shu kut noh ha ki khyndiat por. Hynrei, ka dei ka tynrai kaba kyrpang kaba pynïeng ïa kane ka club.
ïa ka Lajong, la seng ha u snem 1983 da i Bah P.D. Sawyan kum u President bad i Bah Kitdor Syiem (ba la khlad noh) kum u Vice President. Ka jingthmu ka long ba ki briew jong ka Shillong bad Meghalaya ki dei ban lah ban pynmih ïa la ka jong ka football club bad la ki jong ki nongïalehkai kiba lah ban ïaleh pyrshah ïa kiba tbit tam ha ka ri.
Ha u snem 2008, la pynkylla kyrteng ïa ka Lajong Sports Social and Cultural Club sha ka Shillong Lajong Football Club, kaba pyni ïa ka thong kaba kham khraw ban pynlong ïa ka Shillong ka pdeng jong ka phutbol ha ka thaiñ Shatei Lammihngi (North East) bad ban tei ïa ka club kaba lah ban mihkhmat ïa ka thaiñ ha ki lympung ïalehkai phutbol ba hakhlieh tam jong ka ri India.
Kata ka jingangnud ka la shim ïa ka sienjam kaba kongsan haba ka Lajong ka la ïoh ban rung sha ka I-League ha u snem 2009, da kaba long ka klob ba nyngkong eh na ka thaiñ Shatei Lammihngi ban poi sha ka lympung ïalehkai ba ha khlieh duh jong ka ri India.
Ka Jingtei ïa ka Rukom Pynroi Nongïalehkai
Haba ngi la sdang ïa kane ka jingïaid lynti, ka Meghalaya ka don shisha shibun ki sap ïalehkai phutbol bad ka jingieit kaba jur ïa kane ka jingïalehkai. Hynrei kaba duna pat ka long ka rukom pynkyntiew kaba thikna, kaba ryntih bad kaba neh slem ban lap ïa ki khynnah naduh ba dang rit bad ban kyntiew ïa ki haduh ban da poi sha ka kyrdan kaba ha khlieh.
Kine ki la sdang ban kylla shibun hadien u snem 2008.
Hapoh ka jingïalam i Bah D.P. Wahlang kum u President, lem bad i Bah Larsing L.D Sawyan kum u General Secretary, ka Meghalaya Football Association (MFA) ka la sdang ban ai jingmut kaba khraw halor ka phutbol ki samla bad ki khynnah rit (grassroots).
Hadien kata, i Bah Larsing i la long u President jong ka MFA ha u snem 2013 bad i la bat ïa kane ka kam haduh u snem 2023. Ha kane ka por, ki jingïakob ki khynnah, ka grassroots phutbol, ka jinghikai ïa ki coach, bad ki lynti ban pynkup sap ïa ki pla-yer ki la nang kiew jur bha ha kylleng ka Meghalaya. Ha kane ka por la tei ruh ïa 4 tylli ki madan phlang (artificial turf) kaba nyngkong eh ha Meghalaya.
Ha Lajong, ngi la rai ïa kane kajuh ka mat naduh mynshuwa: lada ngi kwah ban neh ha ka kyrdan jong ka ri, ngim lah tang ban shañiah ha kaba thied ïa ki nongïalehkai kiba la paw man la ka aiom.
Ngi hap ban bat skhem ïa ka thong kaba naduh nyngkong, kata ban pynmih hi da la ki jong ki nongïalehkai.
Ka Lajong ka la sdang ban pynleit jingmut ha ka jingpynkyntiew ïa ki samla naduh u snem 2002, bad hadien ba ngi la ïoh rung sha ka I-League ha u 2009, ngi la plie ïa ka prokram “Goal 2014”, ka prokram san snem kaba la shna ban ithuh bad pynroi ïa ki samla ïalehkai phutbol kiba lah ban mihkhmat ïa ka Shillong Lajong ha ka kyrdan kaba heh duh.
ïa ka Goal 2014 la bud pat da ka Goal 2018 bad kiwei ki prokram kiba la pynwan ïa ka lynti naduh ka junior phutbol lyngba ka academy, ka reserve team, haduh ka senior team.
Ki soh kim shym la wan mardor.
Hynrei katba nang leit ki por, ki nongïalehkai jong ka Lajong academy ki la sdang ban mihkhmat ïa ka India ha ka kyrdan samla, ki la ïalehkai bha ha ki jingïakop jong ka ri bad ki la kiew kyrdan pat kum ki nongïalehkai professional phutbol.
Ha u snem 2014, ka kynhun ïalehkai kaba dang rit bha ka rta jong ka Lajong, ki rta jong ki ka long tang kumba 19 snem, ka la jop ïa ka Shillong Premier League (SPL). Ha u snem 2018, ka Shillong Lajong ka la long ka lahduh jong ka ri da kaba jop ïa ka AIFF U-18 Youth League. Ka kynhun hapoh 19 snem jong ngi ka la jop ruh ïa ka Meghalaya State League (MSL).
Shibun ki nongïalehkai kiba la mih na ka Lajong ki la mihkhmat ïa ka India ha ki kyrdan bapher bapher, katba shibun kiwei pat ki la leit ban ïalehkai ha ki club bapher bapher jong ka ri India.
Balei ka Lajong ka la Wad Nongïalehkai na kylleng ka North East ?
Don teng teng ka jingkynthoh ba ka Lajong ka la shim bun palat ki player na kiwei pat ki jylla jong ka thaiñ Shatei Lam-mihngi ha ki snem ba sdang ha ka national league.
Kato ka jingkynthoh ka donkam ban sngewthuh ryngkat bad ka jinglong jingman ha kito ki por.
Haba ka Lajong ka la rung sha ka I-League ha u 2009, ka Meghalaya kam pat da biang ki player kiba la ïoh ïa ka jinghikai kaba paka naduh ba dang rit kaba neh kumba shiphew snem lane palat.
Namar kata ngi hap ban leh ar tylli ki kam ha kajuh ka por: ban ïaleh ban neh ha ka national league katba ngi dang tei ruh ïa ka rukom pynroi kaba lah ban pynmih bun ki nongïalehkai na Meghalaya.
Ngi la wad nongïalehkai na Manipur, Mizoram, Assam bad kiwei ki thaiñ Shatei Lammihngi.
Ngim don jingsngewsih ban phla ïa kata.
Ngi dang ïai bteng ban ngeit ba ka jingpyndonkam lang ïa ka bor phutbol jong ka North East hi baroh ka long kaba donkam lada ki club na kane ka thaiñ ki kwah ban ïakhun pyrshah ïa ki kynhun kiba khlaiñ tam ha India.
Hynrei ka thong ba hakhmat duh jong ngi ka la long bad kan ïai long, ban pynkhlaiñ nyngkong ïa ki sap kiba don hapoh Meghalaya hi, bad nangta sa pynbiang lang da ki sap kiba bha tam na ki thaiñ Shatei Lammihngi bad kiwei pat ki jaka katba donkam.
Mynta, donbok ba ka jinglong jingman ka la pher bha na u snem 2009.
Ka Pateng jong ka Baby League
Kawei na ki sienjam kaba khraw tam ka la wan lyngba ka Meghalaya Football Association.
Ha u snem 2018, ka MFA ryngkat ka jingïatreilang bad ka Tata Trusts lem bad ka All India Football Federation ki la pynlong ïa ka Baby League kaba nyngkong eh ha India, ha JN Stadium bad ha madan MFA ha kajuh ka por.
Da kaba ïohi ïa ka jingjop jong kane ka league, ka AIFF ka la shim ïa kane ka rukom trei bad pynïar ïa ka sha kylleng ka ri. Kumta la kha ïa ka AIFF Golden Baby League, kaba kynthup ïa ki rta 6 snem haduh 12 snem.
Hadien kata, ka MFA ryngkat ka jingkyrshan jong ka Sorkar Meghalaya ka la pynlong ïa ka Meghalaya Baby League kaba nyngkong eh kaba la ïashim bynta da palat 1600 ngut ki khynnah shynrang bad kynthei.
Pyrkhat kaei kata ka jingmut ha kine ki sngi mynta.
Ban shu ai ka nuksa, uwei u khynnah ba 12 snem rta uba la ïalehkai ha ka Baby League ba nyngkong ha u 2018 u la kot kumba 19 snem ka rta mynta.
Katta ka kynthup ïa ka rta jong kine ki rangïalehkai kiba thymmai kiba ngi iohi ba ki la sdang ban paw pyrthei mynta ha ka Shillong Premier League bad kiwei ki lympung ha kylleng ka Meghalaya. Shibun kiwei pat kin sa mih ha ki snem ki ban wan.
Ngi sakhi mynta ïa ka jingwan thymmai jong ki sap ha ka jylla.
Kane kam dei ka jingjia kaba shu jia ryngkhat.
Ka Jingroi jong ka phutbol ka dei ka pateng.
Kane lehse ka dei ka jinghikai kaba kongsan tam na ka jingïaid lynti jong ka Lajong.
Ka jingpynroi ïa ka phutbol ka dei ka kam (projek) jong ki pateng. Kaba ngi bet mynta ka lah ban shim por haduh shiphew ne khatsan snem ban ïoh ot ïa u soh.
Ki nongïalehkai kiba mih ha Meghalaya mynta ki dei kiba la ïoh jingmyntoi na ki rai bad ki jingbei tyngka kiba la leh ha ka shiphew snem lane palat mynshuwa.
Kine ki jingïashem kila ai ïa ngi ka jingsngewskhem halor kaei kaba ka Meghalaya ka lah ban pynmih ha kine ki shiphew snem ban wan, lada mynta ngi pynbiang ïa ki madan kiba kham paka, ka jinghikai kaba biang (coaching), ka sports science, bad ki lympung ïalehkai kiba biang ïa ki samla jong ngi.
Ka Lyngkhot kaba Bud – Ka Centre jong ka jingtbit kaba pawnam ha ka pyrthei
Haba ka Shillong Lajong ka la die noh ïa ka bhah jong ka ha ka NorthEast United FC, ngi la thied mardor ïa ka jaka kaba heh 15 akar ha ka shnong Umniuh hajan ka Umiam da kawei ka jingthmu ba kongsan – ban tei pat ïa ka rukom pynroi ïa ka jingïalehkai phutbol jong ka Lajong naduh tynrai bad ban seng ïa ka jaka ïalehkai ba tbit tam ha ka pyrthei. (World Class Centre of Excellence.)
Kane ka Academy kan kynthup ïa kawei ka hybrid football ground, kawei ka madan artificial, bad kawei ka madan shiteng, ryngkat ki pung jngi, baroh ki jingtei ha ka liang ka koit ka khiah bad ka saïan ïalehkai bad ka jaka sah ban buh palat 100 ngut ki nongïalehkai.
Ka jingïoh rung biang jong ngi sha ka I-League khlem da khmih lynti ha u snem 2022, ka la pynslem noh khyndiat ïa kine ki thong ba hakhmat. Ngi hap ban bei tyng-ka sa shisen biang ha ka jingïashim bynta ha ka National League, nyngkong ha ka I-League bad hadien kata ha ka IFL.
Ka la long kaba eh ïa ka club ban pynlut ha kajuh ka por sha ka jingïalehkai I-League bad sha ka jingtei ïa ki madan bad ki jingdonkam.
Kumta, kane ka prokram tei academy ka lah sahteng.
Ha kajuh ka por, ka la pynshai kdar ïa ka thong jong ngi.
Ka Shillong Lajong kan buh mynta ïa ka jingpynroi ïa ka academy bad ka Centre of Excellence kaba paka ha Meghalaya kum ka mat kaba ha khlieh duh.
Ngi shim ba kane ka long kaba donkam haduh katta katta kat haduh ba lada donkam, ngi pynkhreh ban pyrkhat biang ïa ka jingiashim bynta jong ngi ha ka IFL na ka bynta ka samoi ban wan, bad ban pynkylla ïa kita ki lad-jingïarap sha ka jingtei ïa ka academy.
Ka Club ka la dep ban ïakynduh bad u Myntri Rangbah ba donburom jong ka Meghalaya, u Shri Conrad Sangma, ban pan jingkyrshan na ka sorkar ban tei ïa kane ka Lajong Academy bad ngi la ïoh ïa ka jubab kaba pynsngewbha na u. Ngi khmih lynti ban ïamir jingmut shuh shuh bad ka sorkar halor kane ka mat.
Ngi ngeit ba ka lawei jong ngi kam lah ban thew tang ha kano ka league ka Lajong kan ïalehkai ha u snem ban wan.
Ngi dei ban thew ïa ka kumno ka Lajong kan long arphew snem hadien mynta.
Ka Jinglong Tynrai, ka Jingmut (Philosophy) bad ka Lajong
Ngi ju sngewtynnad barabor ïa ki football club kiba don ïa ka jinglong tynrai kaba skhem.
Ka FC Barcelona ka dei ka nuksa kaba paw bha. Ka La Masia kam shym la shu pynmih tang ki nongïalehkai phutbol. Ka pynroi ïa ki player hapoh ka rukom pyrkhat phutbol kaba ktah pat ïa ka rukom ïalehkai jong ka kynhun ba la kham rangbah.
Ki nongïalehkai kiba la mih na ka Barcelona ki la long ka pdeng jong ka jingjop World Cup jong ka Spain ha u snem 2010. Khathynriew snem hadien, ki nongïalehkai kiba mih na Barcelona bad La Masia ki la shim biang ïa ka bynta kaba donkam ha ka pateng kaba la ïoh rah ïa ka World Cup 2026 jong ka Spain.
Kumjuh ngi ïaroh ïa ka Athletic Club Bilbao bad ka Real Sociedad, ar tylli ki club kiba pyni kumno ka jinglong tynrai jong ka thaiñ, ka jingpynroi ïa ki nongïalehkai phutbol khynnah samla, bad ka phutbol kaba ha khlieh ki lah ban ïa pynskhem iwei ïa iwei pat.
Ngim shym don jingthmu ban shu pyrthuh bud lut ïa kine ki club.
Ngi kwah ban ïoh jinghikai na ki nongrim jong ki bad ban thaw ïa kaei kaei kaba shisha jong ngi hi, ka jinglong phutbol Lajong kaba don tynrai ha Meghalaya bad ka thaiñ Shatei Lammihngi.
Ka jingangnud jong ngi ka long ban hikai ïa ki nongïalehkai naduh ba dang rit hapoh ka rukom pyrkhat bad rukom ïalehkai jong ka Lajong, kiba nang kiew lyngba ki kynhun rta kiba shai haduh ban da poi sha ka senior team.
Ka Jingkitkhlieh jong Ngi ïa ka Pateng ka ban Wan
Ngi sngewsarong ba ka Shillong Lajong ka la lah ban neh ha ka lympung phutbol ka ri India la palat 15 snem.
Ngi sngewsarong ïa ki nongïalehkai kiba ngi la pynmih na ka bynta ka phutbol ha India bad kito kiba la mihkhmat ïa ka ri bad ki club ba tbit ha kylleng ka ri.
Ngi sngew sarong ruh ba lehse ka kyntien Khasi kaba la kham ithuh paidbah ha ri India mynta ka dei ka kyntien “Lajong” – kaba mut “ka jong ngi hi.”
Hynrei ki jingjop kiba la leit noh kim dei ban long ka thong kaba khatduh jong ngi.
Ka bynta kaba bud ka dei ban long ban seng ïa ka kynhun kaba lah ban neh slem pateng la pateng.
Ka jingthmu jong ngi ka long ba uwei u khynnah shynrang ne kynthei ba don ka sap na Meghalaya kin ïoh rung sha ka academy ka Lajong bad ban ïoh ïa ki madan kiba biang, ka jinghikai kaba paka, ka jingnang jingstad, ka jingbam kaba tei, ka sports science, bad ki jingïakob kiba man ka por, ryngkat ka lynti kaba shai haduh ban da poi sha ka kyrdan professional.
Kaba kham kongsan eh, ngi kwah ba ka pateng ka ban wan jong ka Meghalaya kan san bad ka club kaba la tei da la ka jong ka thain kaba ki lah ban kyrshan, ban mihkhmat, bad ha kaba kut ban ioh pateng.
ïa ka Lajong la seng ha Meghalaya,
La thaw ïa ka jinglong jong ka hangne.
Ki nongkyrshan ba khlaiñ tam jong ka ki don hangne.
Bad ka lawei jong ka kan sah tynrai hangne.
Ka jingpynroi ïa ka phutbol ka donkam ïa ka jingïaishah. Ka donkam ïa ka jingbei tyngka khlem da ïoh jingsiew mardor. Ka donkam ban pdiang ba bun kiba bet ïa u symbai ki lah ban ym ïoh mad hi dalade ïa ka jingot.
Hynrei kata ka dei thik ka jingmut jong kaba tei ïa ka jaka pule (institution).
ïa ka Lajong la tei la 43 snem bad ka la ïakhun palat 15 snem ha ka kyrdan jong ka ri.
Mynta ngi phai khmat sha ka pateng ka ban wan. Ka jingïaishah, suki-pa-suki, bad da ka jingkut jingmut kaba thymmai, ka thong jong ngi ka long ban pyntikna ba ka Shillong Lajong kan iai nang khlain, nangkiew shaphrang bad ba ka Meghalaya kan kylla long kawei na ki jaka ba hakhmat duh jong ka ri India na ka bynta ban kyntiew ïa ka sap ïalehkai phutbol, bad ka Shillong, ka jaka ïalehkai jong ka Club kaba heh tam jong ka North East India.
ïa kaei kaba ngi bet mynta, ka pateng ban wan kan kheit.
Habamutlang Lyngdoh
Chief Operating Officer
Shillong Lajong Football Club
