Ka ktien u Blei ka ong, kumba la thoh, ym don uba hok, em, ym don uwei ruh, ym don uba shemphang, ym don kein uba wad ïa u Blei. Baroh ki la ïa sakma noh ki la ïa kylla bym myntoi lang noh, ym don uba leh babha, ym don wat uwei ruh. Namar baroh ki la leh pop bad ki la duh leh nohei ïa ka burom ka jong u Blei. Namar ka bainong ka pop ka long ka jingiap.
Ka ktien u Blei ka ong ruh, kumba la thoh. Kine ki briew ki burom ïanga da ki rmiang shyntur, hynrei ka dohnud jong ki te ka jngai na nga, hynrei ki mane thala ïa nga haba ki hikai ki jinghikai ïa ki hukum jong ki briew naba haba ki ïehnoh ïa ki hukum u Blei, ki bat skhem ïa ka rukom pateng la pateng ki briew. Kumne keiñ ngi ki briew ym don uba hok, watla ngi shakri niam baroh 24 kynta ruh ngim ioh hok. Namar ym don uba bha hynrei tang uwei uba u Blei keiñ.
Ngi ki briew ngi shakri niam ban ioh hok bad ban lait na ka pop. Hynrei ym don uba lait na ka pop. Namar ka dak jong ka pop ka long ka jingiap. Namar ngi ki briew ngim don ka dohnud kaba khuid. Namar ym don u briew uba im ïalap niam ne kiba ong Ah Trai Ah Trai u ban ioh leit hapoh ka hima ki bneng. Ki la leh bun ki kam bah ha ka kyrteng u Trai bad ki la beh noh wat ïa ki ksuid ruh ha ka kyrteng u Blei. Hynrei u Blei un ong ngam ju la ithuh ïa phi khie leit noh na nga phi kiba trei bymman. Kane keiñ ka jingshisha ba ym don uba hok ha ngi ki briew. Namar tang u Blei uba hok bad u bym ju iap.
C. B. Iawphniaw
