Riyadh, Risaw:
Ka jinghiar thma kaba thymmai jong ki Houthi, ka la ther ïa ka jaka buh nongleit nongwan ha ka kad liengsuiñ jong ka Riyadh, shisngi hadien ba 13 ngut ki briew, kynthup ïa uwei u nong India, ki la ïap ha ka jinghiar thma kaba shyrkhei, kaba la kam da ka kynhun jong ka Yemen. Ka jingbthei kaba ym lah ban ithuh, ka la bthei ha ka terminal 4 jong ka King Khalid International Airport, ha kaba ka la sdang ïa ka jingpluh ding, ha kaba uwei u briew u la iap bad 11 ngut kiwei pat ki la mynsaw, ong ka khubor jong ki bor pyniaid liengsuin jong ka Saudi.
Ki bor iada suin jong ka Saudi ki la khanglad ruh ïa u namding liengsuin hajan ka kad liengsuin– kaba khatduh eh na ki katto katne ki jingshah thombor ha ka kad liengsuin ha ka taiew ba la dep. Ki jinghiar thma ba bud dien, ki la pynbor ïa ki bor synshar ha Riyadh, ba kin pynsangeh noh ïa ka jingtreikam ha ka kad liengsuiñ King Khalid International Airport.
Katei ka kad liengsuin, ka la shah thombor saw sien ha kine ki san sngi ba ladep, ha kaba katei ka jingshah thombor ha ka sngi Saitjain, ka dei kaba la pyniap briew tam ha ka khyndew jong ka Saudi, ha kine ki shisnem tam, khamtam naduh ba la sdang ka thma Iran. Palat 300 ngut kiwei pat ki briew ki la mynsaw ha katei ka jingiakhih, don kiba la mynsaw jur bha.
Ka video na katei ka kad liengsuin, ka la paw ha ka online, kaba pyni ïa ka por ba katei ka jingshah thombor kaba shyrkhei, ka la jia ha katei ka kad liengsuin, kaba kynthup ïa ki nongleit jingleit Umrah, kiba dang pynkhreh ban kiew ïa ki liengsuin jong ki. Ka jinglum lang ïa ki dur CCTV na ki angle bapher bapher ka pyni ïa ki nongleit jingleit kiba ap ban kiew ha ka liengsuin jong ki haba ka jingshai kaba rben jyrngam ka bthei, kaba la phah ïa ki phew ngut ki briew ban ialeh ban iada ïa la ka jong ka jingim. Ka dur ka pyni ruh ïa ki bynta jong ka tnum kiba paw ba ki la tyrkhong.
Ka kynhun ba la kyrshan da ka Iran ka la kam ruh ba ka la don bunsien ha ka jingshah thombor, kynthup ïa kawei ha ka kad liengsuiñ Dammam ha ka thaiñ mihngi, ha kine ki 24 kynta ba la dep, bad ka la byrngem ban ïai bteng ban thombor ïa ki jaka ïaid lynti jong ka hima, da kaba khot ïa ki “ka jaka lehkai jong ki shipai jong ngi.”
Ka kynhun pyrshah Houthi ka la khot ïa katei ka jingshah thombor kum ka “jingleh thma kaba pura” bad ka la kular ban jubab da kaba tyngeh.
