New Delhi, Risaw:
Ka India ha kane ka kynti, ka la pynrem halor ka jingshah thombor jong ki jhad khaïi ha ka duriaw Strait of Hormuz, hadien ba kawei ka jhad khaii, kaba don 11ngut ki nongtrei jong ka India, ka la shah thombor ha ki drone ha rud duriaw jong ka Oman. Katkum ka jingïathuh jong u Sarbananda Sonowal, Myntri ka tnat jhad, la ong ba arngut ki nongleit jingleit na India, ki la jah rngai hadien ba ka jhad kit mar ba don lama jong ka Nicaragua, ka MT Petro Dolphin, ka la shah thombor ha ka jaka pynïeng jhad na ka bynta ka kad jhad jong ka Sohar kaba don shatei jong ka Oman.
“Ha ka 11 tarik u Risaw, ka jhad kit um MT Petro Dolphin, kaba kit ïa ki 11 ngut ki nongleit duriaw jong ka ri India, ka la shah thombor ha ki drone ha Sohar Anchorage. Katba hynniew ngut ki nongtrei jong ngi kiba na India, ki la lah ban pyllait im bad ki don ha ka jingshngaiñ, arngut ki nong India, mynta ki dang jah rngai,” ong u Sonowal ha ki rynsan social media.
U myntri u la ong ba ka jingwad bad jingpyllait im ka dang iaid shakhmat da ki nongap rud duriaw jong ka thain.
“Ngi dang ïai bteng ban ïatreilang bad baroh ki bor ba dei peit ban kyrshan pura ïa ki jingpyrshang ban pynlait im kiba dang ïaid shakhmat bad ban pynthikna ba yn shim ïa ki lad ki lynti baroh ban wad ïa ki briew jong ngi kiba la jah,” u la ong.
Ka Forward Seamen’s Union of India (FSUI), ka la sam ïa ka video jong katei ka jingthombor, kaba pyni ïa katei ka jhad, kaba la kem ding, hadien ba katei ka drone, ka la lynshop ïa ka deck.
Ka Embassy jong ka Ri India ha Muscat ka la ong ruh ba ka dang buddien bha ïa ka jinglong jingman ha kaba ïadei bad kane ka jhad kit mar ba don ka lama jong ka Nicaragua.
“Ka Embassy ka dang buddien bha ïa ka jinglong jingman kaba ïadei bad ka MT Petro Dolphin, ka jhad kit mar ba don ka lama jong ka Nicaragua. Arngut na ki 11 ngut ki nongleit nongwan duriaw jong ka ri India kiba don ha ka liengsuiñ la ïathuh ba ki jah.
