Washington, Risaw:
U President ka United States, u Donald Trump, ha ka Sngi U Blei, u la pynbna paidbah halor ka jingsangeh thma ba kynsan hapdeng ka Russia bad Ukraine, da kaba pynkam ba ka Russia bad ka Ukraine ki la mynjur ïa ka jingsangeh iasiat bad ka jingsangeh ban thombor sha ki bynta ba don ki shlem pynmih bor-ding bad kaba u la pyntikna ruh ba kan sa treikam noh shen. Katba, u President ka Ukraine, u Volodymyr Zelensky u la pynpaw ka jingkyndit haba u iohsngew ïa kane ka khubor bad ong ba kane ka long ka khubor ba kyndit ïa u naba kam pat shym la don kum kata ka jingiakut ne jingiamynjur hapdeng ka Ukraine bad ka Russia.
La ong ba u Trump ha katei ka sngi u la pynbna da kaba ong “Ka dan ka jingtreikam ba mardor, kan long ka jingsangeh thma kaba kyrkieh hapdeng ka Russia bad ka Ukraine”, namar la ong ba u Trump u ju don ka bynta ba kongsan ha ki jingpyrshang ban pynkut noh ïa ka thma hapdeng ki ar tylli ki ri Europe, ha ka jingthoh ha ka Truth Social.
U la kam ba baroh arliang mamla ki la mynjur ïa ka jingsangeh thma, da kaba kyntu ïa ki ri, “Wat pynpra ïa ka!” Um shym la batai bniah ïa ka por jong ka jingsangeh thma lane kumno yn pyntreikam ïa ka. Ym shym la don kano kano ka jingkren mardor na ka Kremlin lane na ka White House ha kaba iadei bad katei ka jingsangeh iasiat.
Hadien kane u Zelensky u la ïathuh ha ka Axios ba ka jingpynbna jong u Trump ka dei ka “khubor na ka bynta jong nga”.
“Hynrei lada ki nong Russia ki mynjur ïa ka jingsangeh iasiat ha ka liang ka bor ding ka Ukraine kan mynjur. Lada u president Trump u la iakren ïa kane bad u Putin, sngewbha iathuh ïa ngi ynda la sdang ka jingsangeh iasiat — ngi la pynkhreh bad ngin pdiang ïa ka,” u la ong ha ka lad pathai khubor.
Ha ka jingthoh ba kyrpang hapoh ka rynsan X, u President ka Ukraine u la ong ba u la ïakren bad u President ka Canada u Mark Carney, u General Secretary ka NATO u Mark Rutte bad u President ka Finland u Alex Stubb halor kane ka jingsangeh thma kaba la pynbna da u Trump.
“Ka Ukraine ka kyrshan ïa ka jingsangeh thma, bad ka long kaba kongsan ba ka Russia ruh kan kyrshan ïa ka. Ngi dang ap ïa ki jingtip ba bniah na ka liang jong ka America,” u la thoh, bad bynrap, “Ka Ukraine ka ju kyrshan pura ïa ki sienjam ban pynduna ïa ka jingeh, ban ïada ïa ki jingim, bad ki rai kiba donkam ban pynkut noh ïa ka thma bad ban pynthikna ïa ka jingsuk kaba neh.”
