Srinagar, Risaw:
Hashwa ka jingïakren ha ka kyrdan Sub-committee bad ki heh ka MHA halor ki lad jingïada katkum ka Riti synshar ka ri na ka bynta ka Ladakh UT, ka Leh Apex Body (LAB) ha ka sngi Palei ka la pynrem jur ïa ki jingkren jong ka China halor ka Ladakh bad pynskhem ba ka Ladakh ka dei ka bynta ba kongsan jong ka India bad ka China ka dei ka nongshun ba kynja mynsiem jong ka.
“Ngi pynrem jur ïa ki jingkren jong ki nong China kiba kam ba ka Western Ladakh ka dei ka bynta jong ka China naduh mynshuwa. Ngi kyntait ïa kane ka jingkren namar ba ka Ladakh kam pat ju don hapoh ka China” ong u Co-Chairman ka LAB u Chering Dorjey haba kren ha ka jingïalang bad ki nongthoh khubor ha Leh ha ka sngi Palei.
U la kynthoh halor ka jingkren jong u nongaiktien jong ka tnad kam bar ri jong ka China ba ka China kam shym la ithuh satia ïa ka Union Territory jong ka Ladakh bad ka la kyntait ïa ka jingpynbeit ryntih jong ka India ïa ki 28 tylli ki kyrteng jaka ha kane ka thaiñ kum kaba “beaiñ bad kaba khlem jingmyntoi”.
U la kyntu ïa ka sorkar India, khamtam ïa ka tnad kam pohïing, ba kan pynmih ïa ka jubab kaba tyngeh, da kaba pynskhem ba ka India kan ym ailad wat tang shi inshi ruh ïa ka Ladakh, kynthup ïa ka Aksai Chin, kaba don hapoh ka jingsynshar be-aiñ jong ka China.
U Dorjey u la ong ba ki nong Ladakh ki la im suk im saiñ bad ka India ha kine ki 75 snem ba la dep bad u la khot ïa ka sorkar ban tuklar tyngeh ban jubab ïa ki jingdawa jong ka China.
U Konchok Stanzin, councilor barim jong ka Chushul konstitwensi, u la pynrem ruh ïa ka jingkren jong ka China, ha kaba u la batai ïa ka Ladakh kum ka bynta ba kongsan jong ka India bad u la pynpaw ïa ka jingnoh synñiang jong ki nongshong shnong khappud ha kaba ïada ïa ka jinglong tynrai jong ka ri.
