Imphal, Risaw:
Ka Churachandpur distrik jong ka Manipur, ka don haduh 3,713 ngut kiba ïoh ïa ka jingpang dengue bad khyndai ngut kiba ïap hapdeng ka 1tarik, Ïaïong bad 20 tarik Risaw, 2026, katba ki bor pynïaid ka koit ka khiah, ki dang pynjur ïa ki lad jingpeitngor bad jingsumar ban tehlakam ïa kane ka jingpang.
Ka jingdon jong ki nongpang ka kham bun bha ban ïa ki 332 ngut kiba la ïoh ïa ka jingpang ha ka distrik ha baroh kawei u snem 2025, ong ka jingkheiñ ba la ïasam da ki heh jong ka distrik ha ka jingïalang bad ki nongthoh khubor.
U Deputy Commissioner u Krishna Kumar, u Chief Medical Officer u Henkhoneng Mate bad ka District Hospital Medical Superintendent ka Sania Monica ki la pynshai sha ki lad pathai khubor halor kane ka jingpang khlam bad ki lad jingïada.
Kane ka jingpang ka la nang jur ha kine ki bnai ba la dep, ha kaba ki nongpang ki la kiew na ka 750 ngut bad arngut kiba la ïap ha kaba kut jong u bnai Nailar sha palat 3,700 ngut kiba ïoh ïa ka haduh ka 20 tarik u Risaw.
Ka Sania Monica ka la ong ba ka District Hospital ka la pdiang kumba 910 ngut ki nongpang dengue ha ki Mecicine bad Paediatric Ward naduh u bnai Ïaïong. Ka Hospital ka la ïathuh ba ka jingkoit ki nongpang ka long 99.67 per cent.
Hynrei tang saw ngut na ki khyndai ngut kiba la ïap la pynthikna lyngba ka test ELISA laboratory, katba ïa ki san ngut kiba dang sah ki dang hap ban pynshisha. Ka Monica ka la ong ba une uba ïap u don ïa ki jingpang kiba don hapoh jong u, kynthup ïa ka jingpang dohnud bad khyllai bad ka jingduna ka bor met.
