Guwahati, Risaw:
U Myntri Rangbah ka Assam u Dr. Himanta Biswa Sarma u la kdew ïa ki lai tylli ki mat ba kongsan kiba thmu ban pynkhlain ïa ka ram ha ka rep ka riang, ban pynbha ïa ki jingtei bad ban pyniar ïa ki lad kamai pisa na ka bynta ki nongrep ha kylleng ka jylla.
Ha ka jingthoh ha ki social media , u Sarma u la ong ba ki jingthmu ki ïahap bad ka jingthmu jong ka sorkar ban tei ïa ka Assam kaba roi bad kaba lah ban shaniah ha lade da kaba pynbha ïa ka lad ban ïoh pisa bad kyrshan ïa ki nongrep.
Hapoh ka rukom pynbeit ïa ki ram, ka jylla ka la buh thong ban pynbiang ïa ki 3.49 lak tylli ki account jong ki Kisan Credit Card (KCC) ban iarap ïa ki nongrep kiba dei hok ban siew ïa ki ram kiba la sahkut bad ban ïoh biang ïa ka ram na ki jaka treikam. Ia ka jinglut yn ïasam lang da ka sorkar, ki nongrep bad ki bank.
Ki ram kiba shongdor T.1,741.15 klur la dep ban siew hapoh katei ka framework, katkum ka jingtip ba la ïasam da u Myntri Rangbah ka Jylla.
Ka jylla ka la buh ruh ïa ka thong ban bei 2,050 klur tyngka hapoh ka Agriculture Infrastructure Fund (AIF).
Ka skhim ka ai jingkyrshan ïa ki jingnoh synñiang ba nyngkong jong ki nongrep, ka ram haduh T.22 klur na ka bynta ki projek kiba dei hok bad ka jingpynhiar ïa ka sut haduh hynriew snem, katkum ki kyndon jong ka skhim.
Ka jingthmu kaba lai ka kynthup ïa ka jingiatreilang hapdeng ka PepsiCo bad ka bank ban pynbha ïa ka jingïoh ram na ka bynta ki nongrep sohjew, ban siew ïa ki jinglut jingsep ha ka rep bad ban ai lad ban ioh ïa ki mar rep kiba bha.
Ki jingthmu ki thmu ban pynkhlain ïa ka jingshngain ha ka liang ka pisa tyngka jong ki nongrep, ban pynbha ïa ki jingtei ha ka rep ka riang bad ban kyrshan ïa ka jingroi kaba neh ha ka liang ka rep ka riang jong ka Assam.
