Shillong, Risaw 29
Ka jingsah u Bah Metbah Lyngdoh satang marwei ha ka UDP ka la mih ka jingkylli mynta na kiba bun ki riew rangbah bad ki riew paidbah ka Jylla ba la u Conrad K. Sangma uba dei u Myntri Rangbah ka Jylla uba bat mynta kum u President ka NPP Sengkmie la un pynhiar shuki ne em.
Kane ka jingkylli ka wan namar ba ki 8 ngut ki MLA ka UDP ki la mih ban leit pynïasoh sha ka BJP kaba dei ka seng kaba bat ïa ka bor synshar ha Sorkar Pdeng.
Kine ki phra ngut ki MLA ki long u Bah Lahkmen Rymbui uba la rah lang ïa ka bhah Myntri jong ka UDP haba u leit pynïasoh sha ka BJP ryngkat ki paralok MLA kum u Bah Kyrmen Shylla, Bah Pius Marwein, Bah Mayralborn Syiem, Bah Olan Suin, Bah Synsharkupar Thabah, Bah Matthew Beyond Kurbah, Bah Balajied Synrem.
Hadien katto katne taïew haba u Lamphang ka ïingdorbar u la ithuh ïa kine ki 8 ngut ki MLA ka UDP ban pynïasoh sha ka BJP, ki 3 ngut ki MLA ka UDP kata u Bah Paul Lyngdoh, Bah Renikton Lyngdoh bad Bah Nujorki Sungoh ki la mih noh ban leit pynïasoh sha ka NPP kaba dei ka seng kaba bat ïa ka bor synshar ha ka Sorkar Jylla.
Haba ki 11 ngut ki MLA ka UDP ki la mih noh, mynta uba sah ha UDP dei tang u Bah Metbah Lyngdoh uba dei u President bad uba bat mynta kum u Myntri ha ka Sorkar Jylla ba la ïalam da ka NPP uba dei ruh u MLA na Mairang Constituency.
U Bah Metbah Lyngdoh uba dei u Myntri ha ka Sorkar Jylla u bat ïa ka tnad sam bording, ka Water Resources, Textile bad Taxation.
Kumban shu pynkynmaw ka UDP ka la leit pynïasoh ïalade bad ka Sorkar MDA-2 hadien ba kane ka seng kam lah ban ïalam ïa ka Sorkar ki seng riewlum hadien ka ilekshon MLA ha u 2023 bad ka la hun noh ban ïoh tang ar ngut ki Myntri watla ka don palat 12 ngut ki MLA haba ka leit ban synrop ha ka Sorkar MDA-2 ba ïalam da ka NPP.
Ka jingsdang ka jingor pait ka UDP ka dei hadien ba la pynhap Myntri noh ïa u Bah Paul Lyngdoh bad ïa u Bah Kyrmen Shylla bad la thung bujli ïa u Bah Metbah Lyngdoh bad ïa u Bah Lahkmen Rymbui hynrei hashwa ban dap shisnem kynthih ka jingkylliang myntri, ka UDP ka sah satang uwei u MLA kata u Bah Metbah Lyngdoh.
Kum ban shu pynkynmaw ba kine ki phra ngut ki MLA kiba la rung sha ka BJP ki kwah ba ha ka Sorkar MDA-2 kin pynhap shuki noh ïa u Bah Metbah bad ban thung bujli uwei ne ar ngut ha jaka jong ki. Katba kine ki lai ngut kiba rung sha ka NPP ym shym la ïoh khubor eiei la ki dawa Myntri ne em ha ka Sorkar MDA-2.
Ka jingkylli ka mih mynta ka long hato u Conrad K. Sangma uba dei u Myntri Rangbah ka Jylla un pynhap shuki ne em ïa u Bah Metbah Lyngdoh uba sah satang marwei kum u MLA ka UDP bad uba dei ruh u President ka UDP hadien ba ka NPP ka la lah ban synshar marwei ïa ka Sorkar kaba la kot palat 36 ngut ki MLA.
Ka jingkylli ka mih ruh lada u Conrad Sangma un pynhap shuki ïa u Bah Metbah la un dang donkam ne em ban ïatreilang bad ka UDP ha u 2028.
Haba phai dien khyndiat hadien ka ilekshon MLA ha u 2018, dei ka UDP hapoh ka jingïalam u Dr.Donkupar Roy (Ba la khlad) ka la leit kyrshan ïa ka NPP ban thaw ïa ka Sorkar Synrop bad shaniah ha u Conrad K. Sangma ba un long u Myntri Rangbah ka Jylla ha kito ki snem.
Lada jia ba ka UDP kam treh ïatreilang bad ka NPP ha kito ki snem tharai yn nym ïohi ïa u Conrad K. Sangma ba un long u Myntri Rangbah ka Jylla haduh mynta namar ha kito ki por u long u MP Lok Sabha na Tura Constituency.
Kum ban shu pynkynmaw biang hadien ba la dep niew ïa ki vote ha ka ilekshon MLA ha u 2018 ka NPP kaba ïoh 19 ngut ki MLA ka la ïoh ban ïalam ïa ka Sorkar da ka jingsynrop ka UDP kaba jop 6 ngut, ka PDF kaba jop 4 ngut, ka HSPDP bad BJP kiba jop mar ar ngut, ka NCP kaba jop tang uwei bad ki MLA shimet.
Katba ka Congress kaba jop 21 ngut ki MLA hapoh ka jingïalam u Dr. Mukul Sangma kum u Myntri Rangbah barim ka la hap ban shong ha Liang Pyrshah.
Watla ka UDP kaba sah satang u Bah Metbah Lyngdoh hynrei kane ka seng kan jop beit katto katne ngut ki MLA watla kam jop bun shuh kumba ka jop ha ka ilekshon MLA ha u 2023.
Ym tang ka UDP kaba mad ïa kane ka jingeh ban kylla seng rit paid ha ïingdorbar hynrei ka NPP ruh ka la dep mad teng ha ka samoi treikam jong u 2013 ka jop tang ar ngut ki MLA kata u James Sangma bad Nihim D. Shira hynrei ha ka ilekshon MLA ha u 2018 ka la kiew haduh 19 ngut ban ïalam syndon ïa ka sorkar synrop MDA.
