Shillong, Risaw 30
Ka Shillong Lajong kan sdang ïa ka Indian Football League (IFL) 2026-27 da kaba ïakhun shabar ka Jylla pyrshah ïa ka Mohammedan Sporting Club ha madan Kalyani Stadium ha ka 31 tarik Risaw, 2026 ka ban sdang ha ka por 4:00 janmiet.
Ka Lajong kan leit sha kane ka samoi thymmai da ka thong ban pynkhlain shuh shuh ïa ka kam ïalehkai ha ka samoi 2025-26, ha kaba wan ha ka kyrdan ba ar ha ki kyrdan jong ka league, tang mar shi poiñ hadien ki lahduh ka Diamond Harbour FC.
Ka jingïakhun ba nyngkong jong ki ka pynlong ïa ka jingïalehkai kaba itynnad pyrshah ïa ka Mohammedan SC, kaba dei teng ka lahduh jong ka I-League. Da kaba baroh ar ki liang ki angnud ban sdang da ka jingjop, la khmih lynti ka jingïakhun kan long kaba itynnad shibun.
Na ka bynta ka Lajong, ka jingïoh ïa ka jingjop lane ka jingmih kaba bha ha ka jingïakhun ba nyngkong kan long kaba donkam shisha haba ki thong ban pynkhlain ïa ka jingshaniah bad ka bor naduh kaba sdang hi.
Ka kynhun ka la pynkhlain ïa la ki ‘ranglehkai shwa ka samoi ïalehkai, da kaba pynrung ïa ki nongïalehkai kiba nabar, ki ba na ka thain ruh kumjuh bad ki samla ba tbit. Hapdeng kine ki la kynthup ïa arngut ki nongïalehkai na Brazil, ki ‘defenders’ u Arthur Tiotonio Pangaro bad Joedson Dos Santos, bad u ‘winger’ u Joao Vitor De Paula Morais, uba la paw bha kum u Jota.
U Jota u la shemphang shibun ha ka phutbol jong ka India, namar u la ïakhun na Chanmari FC ha ka samoi IFL kaba la dep. Ka jingtip bha jong u ïa ka phutbol India ka long jingkyrmen ban long ka jingïarap ha kaba u la rung sha kane ka kynhun na bynta ka samoi kaba mynta.
Ka Lajong ka la thep ruh ïa u ‘striker’ uba tbit u Nelson Rymbai, uba la long kum u ‘top scorer’ ha ka Meghalaya State League, da kaba pynkhlain shuh shuh ïa ka kynhun u Emanuel Lalchhanchhuaha u ba la lehkai ha ka Indian Super League (ISL) bad ka Indian Football League, u la don lang bad ka kynhun.
