Shillong, Risaw 30
Ka lympung ïalehkai 1st Inter-School Artistic Gymnastics Championship 2026 ka la sdang ha ka 30 tarik u Risaw 2026 ha Indoor Sports Hall kaba ha J.N. Sports Complex, Polo, Shillong ha kaba la wan shim bynta da 130 ngut ki khynnah shynrang bad kynthei na ki 29 tylli ki skul kane ka nongbah Shillong.
Ïa kane ka lympung ïalehkai ba ar sngi, la pynlong da ka Meghalaya Gymnastics Association bad ka jingthmu jong kane ka long ban kyntiew ïa ka jingïalehkai gymnastics naduh ki khynnah kiba dangrit haduh kiba la heh lasan bad ruh ban pynshlur ïa ki ba kin lah ban pyni ïa ki sap ba kyrpang jong ki.
La plie ïa kane ka lympung da u Working President ka MSOA u Bah John F. Kharshiing kum u kongsan ha ryngkat u General Secretary ka MSOA Bah F.L Pariat ha ka jingïadon lang ki dkhot ka Meghalaya Gymnastics Association bad kiwei.
Te kumta ha kane ka lympung ki khynnah ki la ïoh ban shim bynta ha ka Floor Exercise, Balancing Beam bad ha ka Vaulting.
U Working President ka MGA u J.R Marak ha ba ïakren bad ki nongthoh khubor, u la pynpaw ba kane ka long ka sien kaba nyngkong eh ba kum ka synjuk ka la pynlong ïa ka Inter School Artistic Gymnastics ha kane ka nongbah namar ki la don bun na ki khynnah ki la wan shah hikai pyntbit ïalade la kumba 5 snem kynthih. U la ong ba kane ka Inter School ka long shi bynta ka jingplie lad ïa ki ba kin pyni ïa ki sap ba kyrpang jong ki. U la ïathuh ba ki la don kumba 130 ngut ki khynnah na ki 29 tylli ki skul na East Khasi Hills kiba la wan shim bynta. U la ïathuh ba ka synjuk ka la thmu ban pynlong sa ha Tura bad kumjuh sha kiwei pat ki district ha ki snem ban wan.
Shuh shuh U la ïathuh ba ïa mynta yn pat shym la lah ban pynlong ïa ka Rhythmic Gymnastics bad ka Acrobatic Gymnastics namar ka jingdon ïa ki Hall kiba biang.
