Chhattisgarh, Risaw:
Ki bor synshar ki la weng kam ïa u nongpynïaid jong kawei ka skul sorkar ha ka distrik Balrampur jong ka Chhattisgarh hadien ba la sam ïa ki kot lyngkdop sha ki khynnah skul kiba ïadei bad u Asaram, u nongïalam ba kynja mynsiem uba la shah rai pynrem halor ka jingleh beijot, la pyntip ki heh sorkar ha ka sngi Palei.
Ki kmie ki kpa ki la kam ba ïa kine ki kot lyngkdop la ai sha ki khynnah skul Middle ha Swami Atmanand Government English Medium School of Excellence kaba don ha ka shnong Raghunathpur ha ka 26 tarik, Risaw.
U ophisar ka tnad pule puthi jong ka Balrampur District u Narendra Nirapure u la ïathuh ha ki nongthoh khubor ba la bynshet ïa u ophisar ka tnad pule puthi jong ka Block ban tohkit ïa kane ka jingjia bad ban ai ïa ka kaiphod.
Da kaba pynshong nongrim ha ka jinglap ba nyngkong, ka skul ka la weng noh ïa u Principal Mahesh Prajapati, u la ong bad bynrap ba ka jingtohkit kaba kham bniah ka dang ïaid shakhmat.
Katkum ka jingïathuh jong ki kmie ki kpa, ki la tip shaphang ki kot lyngkdop hadien ba ki khun jong ki ki la wanrah ïa ki sha ïing.
Ki la pynpaw ïa ka jingbym sngewtynnad bad ki la ujor ruh sha ka tnad pule puthi.
Ki kot lyngkdop kiba la ai kyrteng ‘Sanskar Sarita’, ‘Vrat Niyam’ bad ‘Vasudhaiva Kutumbakam’ nalor kiwei pat, la sam haba ki nongbud jong u Asaram ki la leit jngoh ïa katei ka skul ha ka jingdon lang u nongpynïaid skul, la kynnoh u kpa jong uwei u khynnah skul.
“Kine ki pynpawnam ïa u Asaram lane ki ai jingtip shaphang ki nongbud jong u. Ym dei ban sam ïa ki tiar kiba ïadei bad u, namar ba u don ha phatok namar ki kam runar kiba shyrkhei bad ki ashram jong u la shah kurup ha ka sorkar,” u la ong ha ki nongthoh khubor.
“Watla ka long kumta, la sam ïa ki kot kiba ïadei bad u sha ki samla pule. Ngi pyrshah ïa kane bad ngi dawa ban leh da kaba tyngeh ïa u Principal,” u la bynrap.
U Asaram, ula shah rai set phatok shi jingim ha ka mukotduma batbor jong u ha u snem 2013, ha ka ïingbishar ha Gandhinagar, Gujarat.
U dang shah set phatok shi jingim ha kawei pat ka kam leh beijot ïa kawei ka khynnah kynthei kaba dang rit ka rta ha ka ashram jong u ha Jodhpur jong ka Rajasthan ha u snem 2013.
