Mawkyrwat, Naiwieng 09
Ka Thaiñ Ban Kyntiew Youth & Social Welfare Organi-sation, Ngunraw ka la plie ïa ka lympung ïalehkai phutbol kaba tip kum ka 10th Invitation Football Tourna -ment 2026 ha ka 7 tarik mynta u bnai ha ka shnong Ngunraw, South West Khasi Hills District.
Kumba ju long manla u snem ka TBKY&SWO kum shi bynta ban kyntiew ïa ka jingïalehkai phutbol naduh ki khynnah ba dangrit haduh kiba la heh la san, ka seng ka ju pynlong ruh ïa ki jingïalehkai bapher bapher kum ka phutbol, marathon, ki jingshad ki jingrwai bad kiwei kiwei bad ha kane ka snem ka seng ka la ïoh ruh ban pynlong ïa ka jinglehkai phutbol jong ki samla shynrang, ki kynthei bad ki rangbah kiba la kynjoh 40 snem shaneng.
Ïa kane ka lympung la sdang naduh ka 7 tarik bad yn pynkut pat ha ka 31 tarik u Nohprah mynta u snem kum ka jingrakhe lehkmen ïa u snem thymmai.
Ha kane ka sngi sdang, ka jinglehkai ka la long hapdeng ka Rangjadong pyrshah ïa ka Maitshaphrang ha kaba ka Rangjadong ka la lah ban pynliem ïa ka Maitshaphrang da 2-1 kol.
Ïa kane ka lympung la plie pyrda da u Bah Pius Marweiñ, MLA/MDC ka Ranikor Constituency ha ryngkat ka jingdonlang u Myntri shnong u D.E Turnia, Bah John Ïawphniaw, President ka seng, ki riew rangbah bad kiwei kiwei.
