Agartala, Naiwieng:
Ki la don shuh sa 8 ngut ki briew, kiba la shah kem, halor ka jingkynnoh ba ki la thombor ïa ki shipai Border Security Force (BSF) ha Tripura, ha Sepahijala distrik bad pynmynsaw ïa lai ngut na ki, kaba la pynlong ïa ka jingdon jong kiba shah kem, ha katei ka kam, ba ki la poi sha ka 18 ngut, ong ki pulit ha ka sngi Thohdieng.
Ha ka lah sngi U Blei, uwei u Assistant Commandant bad arngut ki shipai BSF ki la mynsaw ha ka jingshah thombor jong ka kynhun ki trai shnong hajan khappud Ashabari.
Kane ka jingjia ka la jia hadien ba la kem ïa uwei u briew uba la suba ba u dei uba khaïi beain ha Sepahijala distrik jong ka Tripura.
Ka kali BSF ruh ka la shah pynjulor bad ki paidbah ki la pyrshang ban knieh ïa ki kti jong ki shipai.
Uwei u heh pulit u la pynthikna, “La kem 8 ngut ki briew ha kaba ïadei bad ka jingshah thombor jong ki shipai BSF ha Ashabari. Kham hashwa, la kem 10 ngut ki nongshong shnong, kiba donkti beit ha ka jingjia ha ka 2 tarik u Naiwieng.”
Ha ka sngi Palei, u Myntri Rangbah ka Tripura u Manik Saha u la pynlong ïa ka jingïalang bishar bniah halor ka jinglong jingman jong ka jingshngaiñ ka jylla bad ki heh ophisar na ka tnad synshar jylla, ki pulit, ki BSF, ki shipai CRPF bad ki Assam Rifles .
Haba kren halor katei ka jingjia, u Myntri Rangbah u la ong ba ki la bishar bniah ïa ka jingjia ha Ashabari bad bthah ïa ki bor pynïaid ban pynthikna ïa ka jingpynshitom katkum ka aiñ kaba tyngeh pyrshah ïa kiba donkti bad “shim ïa ka jingbym shah ïa ka jingkhaïi beaiñ shabar pud bad pynkhlaiñ ïa ki lad jingïada ban pynneh ïa ka jingsuk.”
