Shillong, Naiwieng 12
Ki nongmihkhmat jong ki ar tylli ki synjuk ïalehkai ki la pynlong ka jingleit jurip ryngkat ïa ka jaka siat suloi jong ka Kahilipara Shooting Range ha Guwahati ha ka sngi Palei na ka bynta ka 39th National Games ka ban long ha u snem ban wan.
Ha kane ka jingleit jurip la ïadon lang ki ophisar na ki tnat ïalehkai jong ka sorkar Assam bad Meghalaya, ha ryngkat u President bad General Secretary ka Shooting Association of Meghalaya lem bad ki nongkitkam ka Assam Rifles and Shooting Association.
Ka jingthmu jong kane ka jingleit jurip bad ka jingïalang ka long ban bishar bniah ïa ka jinglong jingman jong kane ka jingpynkhreh namar ïa ka jingïakop siat suloi yn pynlong ha Assam.
Dangshen ka la don ka jingïakren hapdeng ki Myntri Rangbah jong ka Assam bad Meghalaya, te kumta kane ka jingleit jurip ka long ban bishar bniah la ka Assam ka la long na em ba la pynkhreh na ka bynta katei ka jingïakop siat suloi.
Lah ban kdew ba ha katei ka lympung ïalehkai National Games yn pynlong kumba 39 tylli ki jingïalehkai ha Meghalaya, katba mar kawei na ki jingïalehkai yn pynlong ha kylleng ki jylla ka thaiñ shatei lammihngi.
Kiba la mihkhmat na ka Jylla ki kynthup ïa u Working President ka Meghalaya State Olympic Asso-ciation Bah John F. Kharshiing, kumjuh u District Sports Officer ka East Khasi Hills Bah Damang Syngkon, bad u General Secretary ka Shooting Association of Meghalaya Bah Neil Sootinck, katba na Assam ki long u Director ka tnat ïalehkai u A. Bharali, u B. Kalita, General Secretary ka ARSA bad u R Bhagabati, ISSF Judge ka ARSA.
