Ha ka sien ba shiphew rah nam lahduh ka India ha ka SAFF Championship

Shillong, Naiwieng 18 Ka India ka la khur syndon ïa ka nam lahduh kaba shiphew ha ka SAFF Championship, hadien ba ka la lah ban pynliem noh ïa ka kynhun ki shiphew ngut ki rangïalehkai...

Shillong, Naiwieng 18

Ka India ka la khur syndon ïa ka nam lahduh kaba shiphew ha ka SAFF Championship, hadien ba ka la lah ban pynliem noh ïa ka kynhun ki shiphew ngut ki rangïalehkai ka Pakistan da 2-1 kol ha ka jingïakhun final kaba la long ha ka sngi Ba-ar ha Dhaka, Bangladesh.

Kane ka nam jop ka la wan urlong lyngba ka kol kaba khatduh ba la thep da u Sandip Mandi hashwa ban wai kata ha ka minit kaba 88.

U rangïalehkai na Meghalaya u Ricky John Shabong uba na ka shnong Laitlyngkot u la don bynta lang bad kane ka kynhun naduh kaba sdang kane ka lympung bad wat haduh ka jingïakhun final na ka bynta ban rah ïa ka nam lahduh.

Haba phai sha katei ka jing-ïakhun ka Pakistan ka la pynkhih jar nyngkong hashwa ban kut ka jingïalehkai ka kylla step lyngba u Alamgir Ghazi ha ka minit kaba 45+1. Hynrei hadien katto katne por ba la bteng ïa ka jingïakhun jong ka kylla miet, ka India ka la lah ban pynïakhaid kylla lyngba u Suhail Ahmad Bhat ha ka minit kaba 60 bad ïa ka kol kaba khatduh la bynrap sa u Sandip na ka bynta ban khur syndon ïa ka jingjop.

Ïa ka nam Most Valuable Player la khur da u Suhail Ahmad Bhat, katba ka nam Top Goalscorer ka leit sha u Suhail Ahmad Bhat, uba la thep 4 kol ha kane ka lympung bad ïa ka nam Best Goalkeeper la oh da u Arsh Anwer Shaikh.