Shillong, Naiwieng 18
Watla sa tang saw bnai ban sdang ka lympung ïalehkai 39th National Games 2027 ha ka jylla Meghalaya, hynrei kiba bun na ki paidbah ki la pynpaw ka jingartatien ban ïoh pynlong ha ka por ba la buh.
Kat kum ka jingthmu jong kane ka Sorkar Jylla, la ong ba ïa kane ka lympung kaba heh duh jong ka ri la thmu ban sdang naduh 10 haduh 30 tarik u Lber jong u snem ban wan.
Haba pyrshang ban ïakren bad kiba bun na ki paidbah, ki la pynpaw ba ka Jylla kam pat long ba la kloi ban pynlong ha u Lber namar ka jingbym pat dep pura ki jingtei bad jingmaramot na ka bynta ki jaka ïalehkai ha kylleng ka Jylla.
“Ngi dangartatien ba ka Jylla kan ïoh ban pynlong ïa ka National Games 2027 ha u Lber namar katkum ka jingïohi jong ngi naduh ki jaka ïalehkai la ka long ha nongbah Shillong, Jowai bad Garo Hills ym pat ithikna ban lah ha ka ban pyndep hashwa ïa ka por ba la buh.”
Kumba ka paw ki jingmaramot pynbha ïa ki jaka ïalehkai ki dangïaid shaphrang haduh mynta, kine ki kynthup ïa ka Mulipurpose Indoor Hall jong ka SAI Training Centre, ka JN Stadium ka ban pynlong ïa ka jingplie ïa katei ka lympung bad ka jingïalehkai Athletics, ka Indoor Hall kaba ha Kiang Nangbah Statium na ka bynta ka jingïalehkai Judo bad Muaythai, lem bad kiwei ki jingïalehkai ki ban pynlong ha Garo Hills.
Na ka liang ka Sorkar Jylla ka la buh jingtyrwa ban ïoh pynlong haduh 39 tylli ki jingïalehkai ha kane ka Jylla. Kine ki kynthup ïa 25 tylli ha Shillong, 7 tylli ha Tura bad 3 tylli ha Jaiñtia Hills, hynrei ïa mynta ka dangap ïa ka jingmynjur na ka Indian Olympic Association (IOA).
Kine ki jingïalehkai ba la buh ka jingtyrwa ki kynthup ïa ka Archery, Athletics, Aqua-tics, Badminton, Basketball, Boxing, Canoeing & Kaya-king, Cycling, Fencing, Football, Golf, Gymnastics, Hockey, Handball, Judo, Kabaddi, Kho Kho, Karate, Lawn Bowl, Modern Pentathlon, Netball, Rowing, Rugby, Shooting, Squash, Sailing, Triathlon, Table Tennis, Tennis, Taekwondo, Volleyball, Weightlifting, Wrestling, Wushu, Yogasana, Arm Wrestling, Muay Thai, Sports Climbing bad ka Softball (Demo Sports).
Lah ban kdew ba ha ka taïew ba la lah, na ka liang ki dkhot ka Games Technical Conduct Committee (GTCC) jong ka IOA ki la wan sha kane ka nongbah ban jurip ïa ki jaka ïalehkai bad ruh ki jingpynkhreh na ka bynta katei ka lympung.
Watla na ka liang ka Chairperson ka GTCC ka Sunaina Kumari ka la pynpaw ka jingsngewhun halor ka jingpynkhreh ïa ki jaka ïalehkai kiba ki la dep ban jurip ha ka nongbah Shillong bad Jowai, hynrei ïa kine baroh ki mat kin sa rah ïa ka kaiphod sha ka IOA na ka bynta ban pynthikna la ka Jylla ka la long ba la kloi ne em ban pynlong ïa ka National Games ha u Lber jong u snem ban wan.