Yn leit jngoh u Shah ïa ka AP na ka bynta ki kam pynroi bad jingshngaiñ

Itanagar, Naiwieng: U Myntri ka tnat ki kam pohïing jong ka sorkar pdeng, u Amit Shah, un leit jngoh ïa ka jylla Arunachal Pradesh, ha ka 20 tarik Naiwieng, na ka bynta ka jingleit jngoh...

Itanagar, Naiwieng:

U Myntri ka tnat ki kam pohïing jong ka sorkar pdeng, u Amit Shah, un leit jngoh ïa ka jylla Arunachal Pradesh, ha ka 20 tarik Naiwieng, na ka bynta ka jingleit jngoh kaba ar sngi, ha kaba ka por kaba dap lut kaba kynthup ïa ka jingai burom ïa ki pulit, ka jingleit sha ki prokram paidbah bad ka jingbishar bniah ïa ka roi ka par bad ka jingshngaiñ jong ka jylla bad ka sorkar.

U Myntri Rangbah ka jylla u Pema Khandu u la pynbna ïa kane ka jingleit jngoh ha ka 18 tarik u Naiwieng, da kaba ong ba la tyrwa ban pynlong ïa ka jingïalang bishar bniah ban ïakren halor ka jingkiew jong ka jylla, ki jingeh ba kongsan bad ki mat pynroi kiba hakhmat eh.

Kane ka jingleit jngoh ka long hapdeng ka jingjur jong ka jingpyrshah ïa ka jingthmu ban shna ïa ka Siang Upper Multipurpose Project (SUMP), ha kaba la ïathuh ïa ki jingïakhih ha kylleng ka Siang Valley halor ka jingsngewkhia halor ka jingktah kaba lah ban mih na kane ka projek pynmih bor ding kaba heh.

La khmih lynti ruh ba u Shah un ïakren halor ka aiñ bad ka jingïada hapoh ka ri, khamtam haba ïadei bad ka jingdonkam ba kongsan jong ka Arunachal Pradesh bad ki khappud ba khia jong ka ha ka pyrthei. Hynrei u Khandu u la pynshai ba ki kam kiba ïadei bad ka jingïadei bad ki ri ki hap hapoh ka tnad kam bar ri.

“U Myntri Rangbahduh bad u Myntri ka tnat ki kam pohïing ki ju don ka jingsngewkhia ïa ka jylla. La tyrwa ïa ka jingïalang bishar bniah ban ïakren ïa ki jingeh jong ka jylla,” la ong u Khandu ha ki nongthoh khubor.

La thmu ban pynlong ar tylli ki prokram paidbah ha kane ka jingleit jong u Shah, kawei ha ka Police Training Centre (PTC) kaba don ha Banderdewa bad kawei pat ha IG Park ha Itanagar. U Myntri ka tnat ki kam pohïing un ai ruh ïa ki takma sha ki pulit kum ka jingithuh ïa ka jingshakri jong ki.

U Khandu u la batai ïa kane ka jingleit kum ka kabu kaba kongsan ïa ka sorkar jylla bad ki briew jong ka ban ïakynduh bad ka sorkar kmie halor ki mat ba kongsan.