Jam ka Wahlyngkien Sunei sha ka kyrdan ba hakhlieh naba pynliem ïa ka Umkaber

Shillong, Naiwieng 18 Ka Wahlyngkien Sunei SC ka la pynliem ïa ka Umkaber SC da 3-1 kol na ka bynta ban khur jingjop ha ka lympung ïalehkai First Division Football League ba la pynïaid da...

Shillong, Naiwieng 18

Ka Wahlyngkien Sunei SC ka la pynliem ïa ka Umkaber SC da 3-1 kol na ka bynta ban khur jingjop ha ka lympung ïalehkai First Division Football League ba la pynïaid da ka Tyrsad Area Sports Association (TASA) ha ka sngi Balang.

Kane ka jingjop ka la pynlong ïa ka Wahlyngkien ba kan bat ïa ka kyrdan ba hakhlieh jong ka Group-A ha kaba ka la kamai 10 poiñ na ka san sien ïakhun.

Haba phai sha katei ka jingïaleh -kai ka la long kaba itynnad bad kaba ïakhaid bha ha kaba baroh ki kynhun kim shym la lah ban pynkhihjar ha ka kylla step. Dei ha ka kylla miet ba ka Wahlyngkien Sunei ka la ïoh ban pynkhih jar nyngkong ha ka minit kaba 53 lyngba Ksanboklang Warjri. Hyneri ka Umkaber ka la lah ban pynphai kylla shi kol ha ka minit kaba 63 lyngba u Ïaipynbiang Marbaniang.

Hadien katto katne por ka Wahlyngkien Sunei ka la ïoh ban thep ïa ka kol kaba ar lyngba u Rosstar Thabah ha ka minit kaba 72. Une u rangïalehkai shakhmat u la thep biang sa shi kol ha ka minit kaba 90 na ka bynta ban khur syndon ïa ka jingjop.

Ha kawei pat ka jingïakhun hapdeng ka Umkseh SC bad ka Thaiñthynroh SC ki la ïasam mar shi poiñ hadien ba ki la ïakhaid mar 1-1 kol. Ka Umkaber ka la pynkhih jar nyngkong ha ka minit kaba 22 lyngba u Wanhun Nongsiej, hynrei hashwa ban wai ka Umkseh ka la pynphai kylla ha ka minit kaba 85 da u Dibasstar Rani.

Kane ka lympung kan bteng biang ha ka taïew ban wan kata ha ka 26 tarik ha kaba ka Mawponghong SC kan ïakhun pyrshah ïa ka Nongmadan SC ha ka por 12 baje mynsngi bad ka Mawkynroh SC ïa ka Wahlyngkien Sunei ha ka por 2:30 nohphai sngi.