Washington, Lber:
Kat kum ki khubor la ong ba ka United States (US) ka la dep ai jingmynjur halor ka jingphah ia ki liengsuiñ ïapom F-16 kiba la poi kumba $619 Million baroh.
Katei ka song ka kynthup naduh ki ‘namding 100 AGM-88B High-Speed Anti-Radiation Missiles (HARM), 200 AIM-120C-8 Advanced Medium Range Air-to-Air Missiles (AMRAAM) bad kumjuh ruh ki ‘namding ban pynkilan bad ai jinghikai naka bynta ka tnat shipai ka Taiwan.
Kumta ruh la ong ba katei ka jingdie jong ka US ia kitei ki tiar thma sha ka Taiwan kan iarap ia ka Taiwan ba kan lah ban pynkhlaiñ ia ka jingiada naka bynta u pud u sam jongka bad kumjuh ruh kan nang wanrah ia ka jingiadei ba jan hapdeng ka Taiwan bad ka US.
Kane ka jingpynbna, la ong ba ka la wan ha kum kane ka por katba ka United States bad ka China, ki dang ia peit khma mar kylliang haba iadei bad ka Taiwan, namar kumba la iohi ba na ka liang ka China, kam shym kwah ia ki bor ba nabar khamtam ia ka United States ba kin leit ban iadon bynta ha ki kam ki jam jong ka Taiwan.
Ha kajuh ruh ka por la ong ba ha u bnai ba la leit, ka la mih ka jingïakynad hapdeng ka United States bad ka China halor ka jingleit her jong ka ‘Balloon’ na China shapoh u pud u sam jong ka United States, ha kaba ka US ka la kynnoh ba katei ka dei ka tiar syntiat jong ka China, kaba ka China ka la phah ha ka sngi shuwa ban mih u Antony Blinken na US ban leit jurip sha China.
