Kabul, Nailur:
Uwei u dkhot jong ka kynhun Islamic State u la shah rai pynrem haduh 20 snem ha phatok ha ka Sngi Balang namar ka jingiarap ïa ka seng lehnoh kaba la shim jingkit khlieh halor ka jingpynbthei bom kaba la pyniap ïa 13 ngut ki shipai jong ka US bad kumba 160 ngut ki nong Afghanistan ha ka kad liengsuin jong ka Afghanistan ha ki 5 snem ba la leit ha ka por ba ki shipai America ki la mih noh da ka jingkulmar na katei ka ri.
Ka bor ka aiñ jong ka sorkar pdeng ha Virginia, ka la pynrem ïa u Mohammad Sharifullah ha u bnai Iaiong, namar ba u la ai jingkyrshan ïa ki tiar ki tar sha ka seng IS kaba la tip kum ka ISIS-K. Hynrei ki nongbishar kim lah ban mynjur la u kitkhlieh ne em na ka bynta ka jingshah pynbthei bom ka kad liengsuiñ ha ka 26 tarik u Nailar, 2021.
Ki shipai jong ka US ki dang pynlong ïa ka jingpynkynriah ïa ki briew ha kad liengsuiñ ha ka por ba uwei u riew kheiñduh u la pynbthei bom ïalade hajan ka jaka rung kaba la tip kum ka Abbey Gate. Ka bynta jong u Sharifullah ha katei ka jingshah thombor ka long ban wad ïa ka lynti ban leit sha ka kad liengsuiñ Hamid Karzai International Airport, ong ki nongmudui.
U Sharifullah, uba 28 snem ka rta, u la ioh ïa ka jingpynshitom kaba heh duh, na ka bynta ka jingshah rai pynrem tang shisien ha ka mukotduma jong ki kam lehnoh ha ka pyrthei, kaba u President Donald Trump, u la pynbna ha u snem ba la dep ha ka por ba u ai jingkren ha ka dorbar lang jong ka Congress.
U Sharifullah um shym la ai sakhi ha ka jingbishar jong u bad u la kyntait ban kren sha ka ïingbishar ha shwa ba u nongbishar jong ka US District Judge u Anthony Trenga un ai ïa ka jingpynshitom. U nongbishar u la ong ba u nongshah mudui u dei u lehnoh ba la shah pynrem uba khlem pynpaw ïa ka jingsngewsih na ka bynta ka jingsngewsih bad jingjynjar ba shyrkhei kaba u la wanrah.
U Trenga u la iohsngew ïa ki jingkren jong ki nongshah lehbeiñ na ki katto katne ki kmie ki kpa jong ki dkhot shipai jong ka US. Na ka miej kaba jngai tang katto katne phut na ka jaka ba u Sharifullah u shong, ki la ïa bujli ban ai burom ïa ki jingaiti jong ki khun bad batai kumno ka jingshah thombor ka la pynpra ïa ki longiing jongki.
U Mark Schmitz na Missouri, u la kyrpad ïa u Sharifullah, ba un phai bad peit sha u, katba u dang kren shaphang ka jingim bad ka jingiap jong u khun jong u, uba dang 20 snem ka rta, uba dei u Marine Corps Lance Cpl. U Jared Shmit.
