Washington, Nailur:
Ka White House ha kane ka kynti, ka la pynbna ba u President ka US- u Donald Trump, u la pynjlan ïa ka jingbthah ban buh ïa ka dor kaba $100,000 na ka bynta ki visa H-1B ki bym dei ki nongwan buhai shnong, ban ai por sa kumba shi snem.
Ki nongpyntreikam jong ka US kiba kwah ban thung ïa ki nongtrei bar ri kiba tbit ki lah ban pyndonkam ïa ka prokram visa H-1B jong ka sorkar pdeng da kaba siew bai lutksan, kaba ailad ïa ki tech bad kiwei kiwei ki riew shemphang nabar ri ban trei ha America na ka bynta katto katne snem.
U Trump, uba la bud ïa ka jingpynshitom bein kaba jur ïa ki nongwan buhai shnong, u la kynthoh ïa katei ka prokram bad u kwah ban pynkiew junom ïa ka bai lutksan naduh $2,000 bad $5,000 sha ym duna ïa ka $100,000, wat la katei ka jingpyrshang, ka la iakynduh jingeh ha ka liang ka ain.
Ka iingbishar appeal kaba don ha Boston, ka dang bishar bniah ïa ka rai jong u bnai Iaiong, da u nongbishar jong ka sorkar pdeng, uba la shim ba ka bai lutksan kaba heh, kaba la buh da ka sorkar Trump, ka long kaba beain bad khanglad ïa ka sorkar, ban lum ïa ka. Kawei pat ka iingbishar ka dang bishar bniah hato u nongbishar u la kyntait hok ne em ïa ka jingpyrshah ïa ka bai lutksan da ka kynhun khaii pateng jong ka US, ka kynhun ba heh tam jong ka US kaba pynbor ïa ki kam khaii.
Ka hukum ba nyngkong jong u Trump ban pynkiew ïa ka bai lutksan, kaba la pynmih nyngkong eh ha u bnai Naiwieng 2025, la buh ban kut noh mynta u bnai. Kam shym la treikam ïa ki visa ba la ai sha ki nongshong shnong bar ri kiba la don lypa ha ka ri America ha ki visa pule, kiba long ka bynta kaba khraw jong ki nongpdiang thymmai ïa ka H-1B, lane ïa ki jingpynthymmai ïa ki visa ba mynta.
Wat hapdeng ka jingkynthoh ba ki don ki kompeni kiba pyndonkam ïa ki visa ban thung ïa ki nongtrei bar ri kiba kham duna ka bainong ha ka jaka jong ki nong America, ki kynhun khaii bad ki kompeni ki ong ba ki ïarap ban thung ïa ki nongtrei kiba tbit bha bad pynbeit ïa ka jingduna jong ki nongtrei US kiba tbit ha ki katto katne ki karkhana.
Kitei ki visa, kiba la thaw da ka Congress ha u snem 1990, ki long kiba kongsan khamtam eh na ka bynta ki kompeni tech, kiba wad ban shim kam na India bad China.
Ki jingkylla ha ka rukom bishar bniah bad pyntreikam ïa ki nongïoh visa kiba lah ban long, ki la ktah ïa ki jingthmu thung kam bad pynheh jong ki kompeni, ha kaba katto katne ki nongpyndonkam ba pawnam jong ka H-1B, kum ka kompeni kmie jong ka Google, ka Alphabet, ki la kynriah ban pynbun ïa ki jingtreikam ha India.
