Beijing, Nailur:
U khlieh jong ka tnat syntiat jong ka China u la maham ba ka jingstad thymmai ka buh jingma ïa ka jingshngaiñ jong ka ri, ha kaba ki bor bar ri ki lah ban pyndonkam ïa kane ka buit stad ban pynthut ïa ka jinglong jingman ha ka imlang sahlang.
“Ki bor kiba pyrshah” ki pyndonkam bakla ïa ki buit AI ba pynmih jingmih ban “thaw ïa ki khubor sain pyrthei bad pynphriang ïa ki jingtip kiba pynmynsaw”, la thoh u Myntri ka tnat pahara ka jylla u Chen Yixin ha ka jingthoh ba la pynmih online ha ka sngi U Blei.
“Ki pynlong ïa ki thma jingmut paidbah bad ka thma jingmut jingpyrkhat pyrshah ïa ka China, kaba buh jingma beit ïa ka jingshngain ha ka sain pyrthei jong ngi, ka jingshngain ha ki tnat treikam bad ka jingshngain ha ka jingmut jingpyrkhat jong ngi,” u la ong.
Kane ka jingmaham ka wan ha ka por ba u nongïalam jong ka China u Xi Jinping u dei ban ïakynduh ïa u president jong ka US Donald Trump ha Washington mynta u bnai, ha kaba ka jingsynshar AI bad ka jingshngaiñ kan long shi bynta jong ki jingïakren jong ki katba ki jingkhot ki nang kiew ban peitngor bha ïa kane ka teknoloji.
Ki nongialam tech jong ka US ki la khot ruh ban pynslem ïa ka jingkiew jong ka AI.
U CEO jong ka Anthropic, u Dario Amodei, u la maham ha ka sngi Saitjaiñ, halor ka jingsted jong ka jingpynroi ïa ka teknoloji AI, katba ki jingkhuslai ki nang kiew halor ki jingma kiba lah ban mih na ki kor kompiwtor kiba kham stad palat.
U Boss jong ka OpenAI, U Sam Altman, ula ong ba u mynjur ïa ka jingbishar jong u Amodei.
Hynrei u Chen u la maham ba ka AI mynta ka dei “ka madan thma ba kongsan na ka bynta ka jingïakhun ha ka liang ka teknoloji ha ka pyrthei bad ka lynti thymmai na ka bynta ka jingïakhun thma jong ki bor bah”.
Um shym la kdew ïa ki jingma kiba lah ban mih ne buh ïa ki brake ha ki jingkiew ha ka juk stad saian, hynrei u la jied kyrpang ïa u Claude Mythos jong ka Anthropic bad ïa u ChatGPT-5.5-Cyber jong ka OpenAI na ka bynta ki jinglah jong ki ban leh tuh kiba lah ban “wanrah ïa ki jingma kiba khraw ïa ki lad pyntip ba kongsan jong ka China”.
“Ki tnat wad bniah nabar ri ki pyndonkam bha ïa ki buit kum ki web crawler kiba stad, ka jingwad bniah ïa ki jingtip kiba stad, bad ka jingbishar bniah ïa ki jingtip kiba stad ban lum bad ïoh ïa ki jingtip kiba kongsan kum ki jingtip ba kongsan jong ka ri, ki jingtip ba rieh jong ka khaii pateng, bad ka jinglong kyrpang jong ki nongshong shnong,” ong u Chen.
Ka thma jong ka US bad ka Iran ka la pyni ruh ïa ka bynta ba kongsan jong ka AI ha ka kam shipai, da ka teknoloji kaba kham bha kaba ai ïa ki jingmyntoi ha ka madan thma, u la ong.
Ka China ka dei ban “pynthikna ïa ka jingsynshar laitluid ïa ki teknoloji ba kongsan” — kynthup ïa ki chip kompiwtor kiba tbit bha kiba kongsan bha ban hikai ïa ki model AI — ban pynskhem ïa ka jingsynshar jong ka ha ka teknoloji, la thoh u Chen.
