New Delhi, Lber:
Katkum ki kaiphod ba la ioh ban lum tat haduh kane ka kynti, la lah ban sakhi bad pynshisha ba u khñiang jingpang Covid u la wan mih pyrthei na ka jaka pule bniah kaba don hapoh ka nongbah Wuhan jong ka China. Hynrei ha kane ka por la don pat ruh ki nongpule bniah kiba kam, ba u khñiang jingpang Covid u la pur sha ki briew na ki mrad kiba la ioh ia katei ka jingpang khlam.
Namar la ong ba katkum ka kaiphod ba la ioh na ki katto katne ki tnat pule bniah, la shem ia u khñiang jingpang Covid-19 na ki katto katne ki jait mrad, kynthup ia ki jait ksew ‘Racoon’ kiba long kloi bha ban ioh ia katei ka jingpang khlam.
Ha kitei ki jingpule bniah, la shem ruh ba don ki katto katne ki jait mrad kiba kham kloi ban ioh kem ia utei u khñiang jingpang ban ia kaba ki briew ki lah ban ioh kem ia u.
Ha ki khyndiat por ba la leit, ka World Health Organization (WHO) ka la bthah ia ka China ba kan pynkhreh bad phah ia ka kaiphod kaba bniah halor ka jingsdang bad jingpur jong u khñiang jingpang Coronavirus naduh kaba sdang jong ka jingwan mih pyrthei jong katei ka khlam namar kumba la iohi shai ba katei ka khlam, ka la sdang na China bad kumta ruh ka China ka hap ban ai ia ka jingpynshai halor ka daw bad ka jingsdang jong katei ka jingpang kumba ka dei hok.
Namar kumba la iohi bad ïohsngew wat haduh kane ka kynti ba mynta, ka China kam pat shym la pynshai ne pdiang ruh ba utei u khñiang jingpang Covid-19 u la wan mih pyrthei napoh China. Hynrei ka la shu ong ba lada dei ba utei u khñiang jingpang u wan mih na China ruh, ka lah ban long ba u la kum lait bakla na ka jaka pule bniah kaba don ha ka nongbah Wuhan kumba la ju bna baroh shi katta.
