Islamabad, Lber:
Ka tnat Pakistan Meteorological Department ka la iathuh ba ha ka Sngi Ba-ar, u jumai uba jur kumba 6.5 Magnitude u la khynñiuh ha ki katto katne ki bynta jong ka Pakistan. Ha kane ka jingjia 9 ngut ki briew ki la khlad bad kumba 160 ngut pat kiba mynsaw. Ka thaiñ ba utei u jumai u kham jur eh ka dei ha Hindukush jong ka Afghanistan, ha kaba ka jingkhynñiuh jong utei u jumai ka long 180 Kilometre na sha tbian ka khyndew.
La ong ba ia ka jingkhynñiuh la lah ban ïohsngew na Lahore, Islamabad, Rawalpindi, Quetta, Peshwar, Kohat, Lakki Marwat bad ha kiwei de ki bynta bapher jong ka Pakistan.
Shuh shuh ruh la ong ba ia ka jingkhñiuh kaba jur pat la ioh sngewbha ha Gujranwala, Gujrat, Sialkot, Kot Momin, Madh Ranjha, Chakwal, Kohat bad ha ki bynta jong ka Gilgit- Baltistan.
Katkum ki video bad ki dur ba la saphriang ha ki social media, la iohi ia ki paidbah kiba la iamih shabar jong ki iing- ki sem jongki bad ialum lang sha ki surok bad ki jaka ba lait namar ka jingsheptieng ia utei u jumai ioh lehse u lah ban jur kumba long ha Syria ha u bnai ba la leit.
Kumta, la ong ba utei u jumai u la shim ia ka jingim jong 9 ngut ki briew ha katei ka step, kiba kynthup ia 2 ngut ki longkmie bad u la pynmynsaw bad ktah ruh ia 160 ngut kiwei pat, hadien ba bun tylli ki iing ki sem ki la khyllem bad julor.
