Islamabad, Lber:
Uwei u heh pulit jong ka kynhun wad bniah na Pakistan u la kyllon iap ha ryngkat bad 7 ngut ki dkhot hapdeng ka jingiakhun bad ki lehnoh ha ka thaiñ shatei mihngi jong ka Pakistan ha ka Sngi Ba-ar.
La ong ba katei ka thaiñ ka long ka jaka kaba ki kam thombor jong ki lehnoh ka ju kham jur bha khamtam ha u snem ba la leit, kynthup ia ka jingshah pynbthei bom ka jaka mane Muslim ha Peshawar, ha kaba 100 tam ki briew ki la khlad, kynthup ia ki pulit kiba ap pahara ha katei ka jaka.
Kumta la ong ba ka tnat wad bniah jong ka Pakistan, ka la pyntip ba uwei na ki heh jong katei ka kynhun, u la khlad noh hapdeng ka jingiakhun bad ka kynhun lehnoh ha South Waziristan, kaba long ka thaiñ lum bad khappud jong ka Pakistan bad Afghanistan bad ka long ruh ka thaiñ kaba ki kynnoh lehnoh Islamist ki ju treikam bha.
