Bangkok, Lber:
Ki pulit ka Thailand ha ka Sngi Balang ki la leit ban ker kut ia kawei ka jaka ha ka thaiñ shathie-sepngi jong ka nongbah Bangkok, ha kaba ki la ioh ban khang kdong ia utei u runar hapoh ka iingsah jong u hadien ba u la dep ban siat iap ia 2 ngut bad pynmynsaw ia ki katto katne pat kiba don ha katei ka jaka.
La ong ba ki pulit ki la leit ban ker kut ia ka jaka sah jong utei u runar kaba don ha ki bynta jong ka surok Phetchaburi, kumba 170 Kilometre (105 Miles) na Southwest jong ka Bangkok, ha kaba katto katne napdeng jongki, ki la rah bad ki tiar siat bad don ruh kiba rah tang da ki stieh bad ki tiar ban iada.
Ki pulit ki la iathuh ba 2 ngut ki la khlad syndon hashen hapdeng jong katei ka jingjia kaba la jia ha ka por shiteng sngi jong ka Sngi Balang. Katba napdeng jong ki 3 ngut kiba la shah synreit kuli lang ha katei ka jingjia pat, uwei u la ap jingma ia ka jingim jong u namar ka jingjur ka jingmynsaw na ki kuli kiba la ksam ia ka met jong u.
Ia 2 ngut kitei kiba la shu ngat bad mynsaw lang pat la pynkit noh sha ka hospital kaba don hajan, naka bynta ki jingsumar kiba bniah.
Ki pulit ki la pynkynriah noh ia ki khynnah pule na kawei pat ka skul ba marjan ha ka por ba ki leit ban kerkut ia ka iingsah jong utei u runar ha katei ka sngi.
Ka tnat Central Investigation Bureau jong ka Thailand, ka la pynithuh kyrteng ia utei u runar kum u Anuwat Waentong, uba la don 29 snem ka rta. La ong ruh ba utei u runar u dei uba la don dak sniew khamtam ha ki kam khaïi droks, ha kaba u la dei ruh ban leit mih sha ka ïingbishar ha katei ka Sngi Balang haba iadei bad katei ka jingiadon kti jong u ha ki kam drok.
