Kabul, Lber:
Katkum ki khubor la iathuh ba 12 ngut ki briew ki la khlad na u jumai uba la khynñiuh ha Afghanistan bad Pakistan ha ka Sngi Balang. Utei u jumai uba khynñiuh la ïohsngew ha kiba bun ki bynta jong ka Pakistan bad ruh ha India.
Katkum ka kaiphod na ka Geological Survey jong ka United States, la iathuh ba utei u jumai u la heh kumba 6.5 Magnitude bad la ïohsngew bha hajan ki bynta jong ka Jurm ha ki thaiñ Northeast jong ka Afghanistan.
Utei u jumai u la khynñiuh ha Kabul ha ka por kumba 9:30 jong ka step Sngi Ba-ar bad u la neh kumba 30 sekon eiei, la iohsngew ruh ia utei u jumai na ki ri ka phang pdeng jong ka Asia, kynthup ia ka nongbah Delhi jong ka India.
La ong ba utei u jumai u la jur bha bad kumta ka tnat iarap jong ka Pakistan ha katei ka step ka la maham sha ki paidbah nongshong shnong ba kin long phikir bad ba kin pynkhreh lada u jumai uba jur un khie kynsan ha kano kano ka por bym lah ban tip.
Hynrei la ong ba ka long pat kaba donbok ba utei u jumai um shym la neh slem ne jur than eh ruh, ha kaba ki don tang katto katne ki iing bad jingtei kiba la twa.
La ong ba kitei ki thaiñ ba shah ktah bha ha utei u jumai, ki long ruh ki jaka kiba ju mad ia u jumai ba khah khah, khamtam ha ki thaiñ lum jong ka Hindu Kush.
Katei ka distrik Jurm ka don kumba 3000 ki paidbah nongshong shnong bad ka long ruh kawei na ki shnong ka bym shym la iohsngew ban don kiba ngat ne mynsaw ne kiba khlad na utei u jumai watla utei u jumai u la kham jur ha katei ka distrik.
Kumta la ong ruh ba ki paidbah nongshong shnong jong ka Afghanistan bad Pakistan ha katei ka step, ki la mih na la iing bad phet sha ki jaka kiba kham pajih na ki ïingmala namar ka jingsheptieng ioh utei u jumai u lah ban dei uba jur bad uba khlaiñ kumba long ha Turkey bad Syria ha u bnai ba la leit.
La ong ruh ba ki don shibun ki paidbah ki bym shym treh shuh ban leit phai bad ban shong- ban sah hapoh ki iing- ki sem jongki namar ka jingsheptieng ba ioh utei u jumai un wan biang sa shisien.
Haba iadei bad kane, la ong ba ki bor pyniaid ki la pynkynriah jaka sah noh shipor ia ki paidbah kiba shong ha kawei ka ïing mala kaba heh bha ha Pakistan, hadien ba katei ka ïing mala ka la orpait ha ka jingkhñiuh jong utei u jumai ha katei ka step.
