Beijing, Lber:
Ka tnat iada ri jong ka China ha ka Sngi Palei, ka la phah ia ka US ba kan pynmih noh ia ka jhad thma jong ka kaba don ha ki bynta South jong ka duriaw China bad kumta ruh ka China ka la phah ia ka US ba kan pynkynriah noh ia katei ka jhad na katei ka duriaw kaba ka China ka kam ba ka dei ka bynta jong ka.
Namar la ong ba ka China ka la kam trai hi ia katei ka bynta jong ka duriaw kaba don sha ka phang South jongka.
La ong ruh ba ki don kiwei kiwei pat ki ri kum ka Philippines, Vietnam, Malaysia bad ka Brunei kiba la kam trai ia ki bynta jong katei ka duriaw hynrei ka United States ka pyniaid ia katei ka jhad jongka sha katei ka bynta, kum shi bynta ruh ban pyni ia ka jinglong laitluid bad ka jingbym long trai jong kano kano ruh ka ri ha katei ka duriaw naba baroh ki ri ki lah ban iadon bynta ha katei ka duriaw.
Ka tnat Southern Theater Command jong ka People’s Liberation Army (PLA) jong ka China, ka la iathuh ba ka USS Milius, ha katei ka Sngi Palei ka la leit ban rung shapoh u pud u sam jong ka Paracel Island, ia kaba la kam trai da ka Vietnam.
Kumta, ka PLA ka la phah ia ki shipai pahara duriaw bad shipai suiñ ba kin leit ban peit thuh bad ban leit syntiat ia katei ka jhad thma jong ka US bad ha kajuh ka por ruh ka la maham ia ka US ba kan phah mih noh ia katei ka jhad na katei ka bynta.
Namar ka China ka la ong ba ka US ka la shu phah be-aiñ ia katei ka jhad sha u pud u sam jong ka China, khlem da ioh ruh wat tang ia ka jingbit ne jingai ktien na ka Sorkar China bad la ong ba kane ka lah ban wanrah jingthud ia ka suk- ka saiñ jong ka China ha kitei ki thaiñ khappud.
Hynrei, tad haduh ka step Sngi Thohdieng ruh la ong ba ym shym la ioh jubab eiei na ka US haba iadei bad kane.
Ban pynshisha ba ka China ka long trai ia katei ka bynta South jong katei ka duriaw, ki bor pyniaid ka China ha ki snem ba la leit, ki la buh ruh da ki dew lynnong ba shu thaw hi (Artificial Islands), ha kaba la buh da ki tiar bad ki shlem treikam jong ki shipai.
Ki la don ruh ki nongtong doh jong kiwei ki ri ba marjan jong katei ka duriaw, kiba la iathuh ba ki shipai ka China ki ju pynthud ia ki haba ki leit ban iaid ne tongdoh ha katei ka duriaw.
