Lahore, Lber:
U Myntri kam poh iing jong ka Pakistan, u Rana Sanaullah ha kane ka kynti u la ther pyshah ia u Myntri Rangbahduh barim jong ka ri u Imran Khan halor ka jingkynnoh ba ki don kiba thmu thombor ban shim ia ka jingim jong u. Kumta ruh u Sanaullah u la ong ba u Imran Khan u long u nongshun jong ka sorkar Pakistan hapoh ka jing-ialam jong ka PML-N ha kaba u Khan u la shim kabu ia ka kam saiñ pyrthei da kitei ki rukom. Hynrei la ong ba ka jingshisha ka long ba yn nym don kum kita kiei- kiei bad ym don ba thmu sniew ia u Imran Khan ne ia ki nongialam jong ka Sorkar ba mynta ruh namar ka dei tang ka jingshim kabu jong u hi.
Katei ka jingkren jong utei u nongialam ka Pakistan Muslim League (N) [PML-N], uba long u paralok ba iajan bha bad u Nawaz Sharif, ka long ruh ban pynrem halor ka jingkynnoh jong u Imran Khan ba don ki briew kiba thmu ban thombor bad ba ka jingim jong u ka don hapdeng ka jingma.
Namar la ong ba, u Imran Khan hadien ba u la lait im na ka jingshah ther kuli hapdeng ka jingialang paidbah ha Wazirabad jong ka Punjab Province ha u Naiwieng jong u snem ba la leit, u la jer kyrteng ia u Rana Sanaullah kum uwei napdeng ki katto katne ki heh kiba kwah ban thombor bad ban shim ia ka jingim jong u. u Imran Khan, uba la don 70 snem ka rta, u la jer kyrteng ruh ia u Myntri Rangbahduh jong ka Pakistan – u Shehbaz Sharif bad ia uwei u heh ISI ha ka ejahar kaba u la leit ban ujor pyrshah halor kitei kiba thmu ban shim ia ka jingim jong u ha katei ka por.
Ha ka jingiakren bad ki lad pathai khubor ha ki khyndiat por ba la leit, u Sanaullah u la ong ba ym shym don kum kitei ki jingkynnoh katkum ba la kam da u Imran Khan. Kumta ruh u la ong ba ym don ba ap jingma eiei- la ka long ia u Imran Khan ne ia ki nongialam jong ka sorkar ba mynta namar kitei baroh ki long tang ki kam politiks jong u Imran Khan bad jong ka seng Pakistan Tehreek-e-Insaf (PTI).
Hynrei haba la kylli pat, la katei ka jingkren jong u ka lah pynban ban long ka jingïakynad bad ka thma poh iing hapoh Pakistan, u Sanaullah u la ong ba, ka la dep jia lypa ka thma ha baroh shi katta bad ym pat don jingsuk ha Pakistan namar ka jingdon jong kum kitei ki nongialam kiba leh politiks tang naka bynta ka myntoi shimet.
Namarkata ruh u Sanaullah u la kyntu ia ka Supreme Court ba ka dei ban bishar bniah halor kane ka bynta bad ym ban shu kynnoh ne phareb madei ia ka Sorkar ba mynta hapoh ka jingialam jong ka PML-N namar kitei ki long tang ki kam saiñ pyrthei jong u Imran Khan hynrei ymdon eiei sha lyndet.
