Moscow, Lber:
Ka Russia ha kane ka kynti ka la ong ba ka jingpyrshah bad jingpynrem na ki ri jong ka thaiñ Sepngi baroh kawei, kan ym pynkylla ia kaei kaba ka Russia ka la buh jingmut bad thmu naduh kaba sdang bad kumta ruh u President ka Russia, u Vladimir Putin u la ong ba ka Russia kan ym sangeh ban phah da ki tiar ‘Nuclear’ sha Belarus naka bynta ban pyniaid shakhmat ia ka jing-iakhun pyrshah ia ka Ukraine wat lada kiba bun ki ri kin ai jingkyrshan ia ka Ukraine.
Namar kumba la iohi ha kine ki sngi ba la leit, ki ri na sepngi ki la pynrem halor ka jingpyndonkam jong u Putin da ki tiar Nuclear ha Belarus, uba long u khappud jong ka EU bad NATO, ha kaba kitei ki ri ki la thmu ban pynngat kyndon biang pyrshah ia ka Russia bad ban pynkut noh syndon ia baroh ki jingiadei kam namar ka jingleh bym suitñiew jong ka Russia ia ki jingmaham jongki.
Namarkata ruh ka Ukraine ka la pyntip ba ka kwah ban shong jing-ialang kyrkieh bad ka UN Security Council halor katei ka jingleh jong ka Russia, kaba ap jingma haduh katta ia ki paidbah bad ia ka Ukraine baroh kawei lada ka Russia kan sdang ban pyndonkam da ki tiar Nuclear kiba khlaiñ bor.
Katba, ha ka jing-iakren bad ki lad pathai khubor ha ka Sngi Saitjaiñ, u Putin u la ong ba kane kam long kaba phylla namar ka Russia ka khlem pynkheiñ ia ki kyndon ba la buh haba iadei bad ka thma bad ka la pyndonkam ruh ia ki tiar kiba ka dei hok ban pyndonkam.
