Kabul, Lber:
Katkum ki khubor la ong ba 6 ngut ki ‘riew paidbah ki la khlad ha ka jingleit pynbthei bom u dkhot jong ka kynhun lehnoh Islamic State ha Afghanistan bad kumba katto katne ruh ki la mynsaw ha katei ka jingjia.
Ha ka jingshisha la ong ba ka jinglong jingman bad ka jingshngaiñ hapoh Afghanistan ka la kham biang naduh ba ka Taliban ka la ioh ban bat ia ka bor synshar hapoh katei ka ri ha u Nailar jong u snem 2021, hynrei la ong ba ka kynhun lehnoh IS ka la nang kham pyni bor bad ka la nang pynkhlaiñ ruh ia ki kam thombor jongka na ka por sha ka por.
Ha ka Lah Sngi U Blei, ki bor pahara jong ka Afghanistan ki la lah ban pynithuh ia utei u lehnoh ba don kti ha katei ka jing pynbthei bom bad ki la siat iap syndon ia u habar jong kawei ka ophis treikam jong ka tnat kam bar ri.
Ha katei ka jingbthei, la ong ba 6 ngut ki paidbah kiba don ha katei ka jaka ki la khlad ha shen bad katto katne ngut pat ki la mynsaw bad ngat lang ha katei ka jingbthei.
Kumjuh ruh ka kynhun lehnoh IS ka la shim jingkit khlieh bad kam trai halor katei ka kam thombor ba la leit da utei u dkhot jong katei ka kynhun ha katei ka sngi.
Ka tnat NGO Emergency, kaba dei khmih ia kawei ka jaka sumar ha katei ka nongbah, ka la pyntikna ba ha katei ka sngi, katei ka jaka sumar ka la ioh pdiang ia 14 ngut kiba leit ban shah sumar, kynthup ia 2 ngut kiba la khlad naduh shwa ban poi sha ka jaka sumar.
La ong ba katei ka jingbthei ha ka Lah Sngi U Blei, ka long ka jingjia kaba ar ba kan jia hajan ka ophis treikam jong ka tnat kam bar ri hapoh ka nongbah Kabul jong ka Afghanistan, ha kaba ka jingjia ba nyngkong ka long ha ka Sngi Palei jong ka taiew ba la leit hapdeng ka jingleh niam jong ki jaitbynriew Muslim.
Kumjuh ruh ha ka 11 tarik jong u Kyllalyngkot, uwei u riew kheiñ duh u la pynbthei bom ialade hajan jong ka tnat kam bar ri, ha kaba 10 ngut ki la khlad ha shen bad kumba 53 ngut kiba la mynsaw bad ngat ha katei ka jingjia.
Katba, na ka liang jong ka Taliban bad kumjuh ruh ka IS, ki la pynbna ba tang 5 ngut ki la khlad ha katei ka jingbthei.
Kumta, la ong ba ka kynhun IS ka long kaba buh jingma shibun eh ia ki paidbah nongshong shnong jong ka ri Afghanistan ha kine ki sngi, namar da ki spah ngut ki ban mynsaw bad khlad ruh na ka por sha ka por katba ki bor pyniaid jong ka Afghanistan kim pat lah ban ai jingiada kaba biang naka bynta ka ri.
Kumjuh ruh ha u Nohprah jong u snem ba lah lah, 5 ngut ki nong China ki la mynsaw hadien ba ki kynhun kieng atiar ki la leit ban rung jubor bad thombor ia kawei ka hotel kaba paw bad kaba ki nongkhaïi ki ju leit bha ha katei ka hotel ha Kabul.
Ia katei ka kam thombor ruh, la kam trai bad shim jingkit khlieh hi da ka Islamic State (IS) ha kaba katei ka kynhun ka la ong ba ha katei ka jingjia, ka leit ban khynra bad ban thombor ruh ia uwei u heh jong ka Paksitan uba don ha katei ka nongbah Kabul.
Katba, ha u Nailur jong utei hi u snem 2022, 2 ngut ki nongkhaïi jong ka Russia, ki la khlad ha ka jingpynbthei bom jong u riew kheiñ duh, ha kaba katei ruh ka dei ka kam thombor ba la kam trai da ka kynhun lehnoh IS.
