Athens, Lber:
Ki bor pyniaid jong ka Greece ha ka Sngi Ba-ar ki la ioh kem noh ia 2 ngut ki nong Pakistan halor ka jingthombor pyrshah ia 2 ngut ki nong Jew bad Israel hapoh ka ri.
Ki pulit jong ka Greece ha ka Sngi Ba-ar ki la lap ia ka jingthmu jong kawei ka kynhun ehrang ban thombor ia kitei ki jait bynriew kiba don hapoh ka ri bad la ong ba kitei ki kynhun lehnoh ki thmu ban thombor wat ia ki riew paidbah jong ka ri bad kumta la ong ba kane kan long ka jingma kaba khraw ia ka suk- ka shngaiñ jong ki paidbah nongshong shnong ka Greece lada dei ba ki pulit kim shym la lah ban pynsangeh bad tehlakam noh ha kane ka kynti.
Ki pulit ki la iathuh ba ki la ioh ban kem noh ia 2 ngut ki bar ri bad kiba long ki dkhot jong katei ka kynhun lehnoh hadien ba ki la ioh jingtip bad ioh ksai shaphang katei ka kam thombor jong katei ka kynhun.
La ong ruh ba ki nongthmu ba hakhlieh jong katei ka kam thombor ki dei hi ki nong Pakistan kiba don ha Iran. Kumta, uwei na kitei kiba la shah kem, u la phla ba ka jingthmu ba hakhmat eh jongki ha kane ka kynti ka long ban leit thombor ia kawei ka jaka bam jong ki nong Jiw (Jewish Restaurant).
Ki pulit ki la iathuh ruh ba ki dkhot jong katei ka kynhun, ki don shibun tylli ki thong bad ki jingthmu thombor hapoh ka ri bad ha kane ka por ki dang thmu ban leit thombor nyngkong eh ia katei ka jaka jong ki Jiw. Shuh shuh ruh ki pulit ki la iathuh ba katei ka kynhun lehnoh ka dang ialeh ruh ban pynrung dkhot shuh shuh naka bynta ban pynjur ia ki kam thombor jongka hapoh Greece.
La iathuh ruh ba dei ka tnat wad bniah jong ka Israel kaba la lap ia katei ka kynhun bad ka la iarap ia ki bor pyniaid jong ka Greece ba kin lah ban bud dien bad lap ruh ia katei ka kynhun, ha kaba la shem ba katei ka kynhun ka don jingiadei shaduh sha Iran bad ka jingthmu thombor jongki ka wan na Iran.
Nalor jong ka Greece, la shem ba katei ka kynhun lehnoh na Iran, ka thmu ban thombor ruh wat ia kiwei kiba bun ki ri, khamtam ha ki ri kiba mar khap bad kham hajan.
