New Delhi, Lber:
Ka Jemima Goldsmith, kaba long ka nongpynmih phlim ba pawnam jong ka British bad kaba long ruh ka kurim barim jong u Myntri Rangbahduh barim jong ka Pakistan u Imran Khan, ha kane ka kynti ka la phla ba ki don ki nongbud dien bad kiba thmu ban leit rung jubor bad ban thombor ia ka ha ka jaka sah jongka ha ka por shiteng miet. Ka Goldsmith ka la iathuh ba kane ka la jia ha ki khyndiat sngi ba la leit.
Ka Goldsmith ka la pyllait ruh ia ki dur hapoh ka Twitter jongka, ha kaba la iohi ia kawei ka kynhun ki runar kaba dang thmu ban rung jubor sha katei ka jaka ba ka sah bad ia katei ka dur la ioh ban shon dur bad ring lyngba jong ki camera CCTV ba la pyndait ha katei ka ïingmala ba ka sah.
Kumta, ka la kyrpad ia ki paidbah kiba iohi bad ïohsngew shaphang katei ka khubor ba, lada ki don jingtip ne don jingithuh eiei ia kitei ki briew kiba don hapoh jong katei ka kynhun runar ba kin sngewbha ban pyntip sha ka khnang ba kan ioh ban pyntip sha ki pulit bad ki bor pyniaid ba yn pynngat ia ki hapoh jong ka aiñ katkum ki jingleh pynkheiñ aiñ bad jingthmu sniew jongki.
Haba ïakren bad ki lad pathai khubor, ka Goldsmith ka la iathuh ruh ba ha katei ka shiteng miet hi, ka la phone mar mar sha ki pulit ban pyntip shaphang ka jingdon jong ki riew sniew kiba thmu ban leit thombor ia ka hapoh ka jaka sah jongka.
U Imran Khan u la shong kurim ia ka Jemima Goldsmith ha u snem 1995 bad ki la iakhlad noh ha u snem 2004 bad ka la long kumba 9 snem hadien ka jingiapoi kha jongki. Kitei ki shi kurim ki don 2 ngut ki khun, u Sulaiman bad u Kasim, ha kaba ki la leit phai noh sha Britain ha ryngkat bad ka kmie jongki hadien katei ka jingiaphet jong ka Goldsmith bad u Khan.
