Moscow, Lber:
Ka ïingbishar jong ka Moscow ha ka Sngi Palei, ka la hukum ban bat noh ia u Evan Gershkovich kumba 2 bnai kynthih halor ka jingsuba don kti jong u ha ki kam syntiat naka bynta ka United States. U Evan Gershkovich u long u nongthoh khubor jong ka Wall Street Journal ha United States bad un shah pynshong ha ki jaka sah ba shipor tat haduh ka 29 tarik jong u Jymmang 2023.
Watla katta, la ong ba ka ïingbishar ka dang lah pat ban kyntiew biang ia ki sngi ban setkut ia u ha katei ka jaka hadien ynda la kut katei ka por ba la buh.
Na ka liang jong utei u nongthoh khubor, u la iathuh ba um shym leit sha Russia ban leit syntiat hynrei u leit hi da la ka mon sngewbha naka bynta ka jingdonkam ba shimet jong u hi.
Hynrei, ka tnat FSB jong ka Russia, ka la pynbna ba la kem noh ia u Gershkovich ha ka Sngi Palei, namar la suba ia u ba u leit khnang sha Russia tang ban leit syntiat bad ban ioh phah jingtip sha United States.
Kumjuh ruh na ka liang jong ka tnat pathai khubor Wall Street Journal, ka la pynpaw ka jingsngew khia halor ka jingshah kem jong u ha kane ka por.
Namar la ong ba u Evan Gershkovich u la trei teng hapoh ka AFP jong ka Russia, hashwa ba un leit pyniasoh sha ka kam thoh khubor bad ka Wall Street Journal ha u snem ba la leit.
