Washington, ïaïong:
Hadien 3 snem ka jingshah pyniap jong uwei u dohiong ha uwei pat u heh pulit uba dei u dohlieh da kaba khñiot da ka khohsiew na u ryndang jong utei u dohiong kumba 9 minit, ka nongbah Minneapolis ha ka Sngi Thohdieng pat ka la pynbna ba kan pynkylla dur noh ia ki station pulit kiba don ha kylleng jong ka nongbah baroh kawei.
La ong ba ka jingiap jong utei u rangbah dohiong, u George Floyd uba la don 46 snem ka rta, ka la wanrah ia ka jingiakhih paidbah kaba jur ha kylleng jong ka ri bad wat ha kito ki nongbah kiba la paw jong katei ka ri, ha kaba ki la rah da ka jingthoh kaba ong ‘Black Lives Matter’ kaba mut ba ka jingim jong ki dohiong ruh ka long kaba kordor.
La ong ba katei ka jingshah pyniap jong utei u rangbah ka la jia ha ka 25 tarik u Jymmang, jong u snem 2020, ha kaba ka la wanrah ia ka jingiakhih paidbah bad ka jingpyrshah na ki paidbah jong ka Minneapolis bad kumjuh na kiwei ruh ki nongbah ba paw jong ka US.
Hadien ka jingiap jong u, ka Minnesota Department of Human Rights ka la shimti ia ka kam tohkit bniah halor katei ka jingjia, ha kaba la pynkut noh ia katei ka mat ha u snem 2022 bad la ioh ruh ia ka daw jong katei ka jingjia, ha kaba la shem ba katei ka jingshah pyniap jong utei u rangbah dohiong ka long tang namar ka jingibeiñ jaitbynriew hapoh jong katei hi ka tnat pulit.
Kumta, u heh jong ka Minneapolis u Jacob Frey ha katei ka sngi u la ong ba, naduh kane ka sngi, yn pynkylla dur noh ia ka jinglong jingman jong ka kam pulit hapoh ka nongbah.
Kumta la ong ba ia katei ka jingiasoi ba 144 sla ha kane ka por, la iakut hapdeng katei ka nongbah bad ka Department of Human Rights hadien ba la dep ban ioh ia ka kaiphod jong katei ka jingjia ha u snem ba la lelit. Watla katta, la ong ba ha kane ka por yn dang hap ban ap pat sa ia ka jingmynjur bad ban da ioh jingbit na ka ïingbishar.
Katkum katei ka jingiakut, la ong ba la pynduh bor ia ki pulit ba kim bit shuh ban phah ia ki kynhun pulit ha baroh ki jingjia, hynrei kin lah ban phah ia ka kynhun pulit tang haba don ki jingjia kiba kham kongsan, khamtam haba iadei bad ka jingpynshitom ia ki nongleh pynkheiñ aiñ.
