Ottawa, ïaïong:
Ki bor pahara duriaw jong ka US ki la lap ia 8 tylli ki metïap hajan khappud Canada bad United States hadien ka jingpyrshang ban rung be-aiñ shapoh u pud u sam jong ka United States, ha kaba 2 ngut napdeng jong kitei ki 8 ngut, ki dei ki khynnah rit.
Ia kitei ki metïap la shem najan ka lieng ba la kylla bad kaba dei jong uwei u briew uba la jah na Akwesasne Mohawk.
Ha ka Sngi Palei, ki bor pyniaid ki la iathuh ba ki la ioh tam ia 6 tylli ki metïap bad napdeng jong kitei ki 6 ngut la kynthup ruh ia iwei i khyllung ba dang hapoh 3 snem ka rta.
Hadien katei ka sngi, ha ka Sngi Thohdieng pat ki bor pahara duriaw ki la lap sa ia 2 tylli ki metïap ha kaba uwei u dei u nong Roman bad kawei pat ka dei ka kynthei nong India namar ba ka don ia ka Passport India
Kumta ki bor pyniaid ka Canada ki ngeit ba kitei ki briew ki thmu ban leit rung sha United States da ka rukom kaba long be-aiñ, hynrei namar ka jingsniewbok katei ka lieng kaba ki shong ka la leit kylla khongpong noh ha katei ka um ha khappud jong ka US bad Canada ha katei ka sngi.
