Imphal, Iaïong:
Ka jylla Manipur ka la mad ia kawei na ki jingeh ha kane ka kynti ba mynta ha kaba ka daw halor kane ka dei ka jingduna jong ki nongiasaid aiñ ha kaba tang namar kane haduh 73,000 tylli ki case la hap ban pynsahteng.
Ka jingduna jong ki nongiasaid aiñ ka la pynlong ia ka iingbishar ban hap sangeh noh shwa ban ai ia ka rai halor kiba bun ki mokotduma bad haduh ka 2 tarik u Iaiong mynta u snem ka Manipur High Court ka la pynbna ba ki don 2 tylli ki post bathylli.
U Chairman barim ka Manipur Human Rights Commission (MHRC) uba long ha kajuh ka por u Senior Advocate u Khaidem Mani ha ka jingai jingkren sha ki lad pathai khubor halor ka jingduna ki nongiasaid aiñ ula iathuh ba kane ka la pyndkoh ia ka rukom treikam bad pynsahteng ia phew hajar tylli ki case.
Ha kajuh ka por tang na ka daw jong ka jingduna palat ki nongiasaid aiñ ki don ruh ki case kiba la shu pynbam pisa ia ki nongiasaid aiñ ban pynkut noh khlem da iasaid ha iingshari.
U Mani ula ban jur ba donkam ban thung noh ia ki nongiasaid aiñ na ka bynta ki post kiba lait khnang ba ka jingtreikam jong ka Manipur High Court kan iaid sha khmat.
Ka jingeh kaba u Mani ula pynpaw halor ka jingtreikam ka Manipur High Court ha kine ki sngi bad por ba mynta ka dei ba tang 3 ngut ki nongiasaid aiñ ki la hap ban iasaid haduh 100 lane 150 tylli ki case ha ka shisngi.
Ha ka jingwad jingtip la lap ba ki case kiba dang sah ha Manipur High Court naduh u 2014 haduh 2022 ki la poi sha ka 73,565.
