Guwahati, Risaw:
Katkum ki khubor, la ong ba ki jingïakhih ba shyrkhei pyrshah ïa ka jingthmu ban tei ïa ka dam ‘Multipurpose Dam’ ki la wanrah ïa ka jingïakynad kaba jur ha Pasighat jong ka thaiñ Mihngi jong ka jylla Arunachal hapoh ka distrik Siang ha ka miet Sngi Thohdieng, ha kaba ki bor pyniaid ki la phah ïa ki kynhun bor pahara ban leit tehlakam ïa katei ka jingjia ha katei ka jaka ha katei ka miet.
Ki jingiakhih ki la bteng haduh ka por 4 baje mynstep ha kaba ki iing bad ki jaka sah jong ki MLA Ninong Ering bad Oni Panyang, bad u President ka BJP ka jylla u Kaling Moyong ki la shah thombor bad shah pynjulor naphang, la iathuh ki tyllong khubor.
Ki la don ki khubor ba don ka jingwiang ding ha ki katto- katne ki bynta jong ka Pasighat. Ki tyllong khubor ki la iathuh ba ki nongiakhih ki la thang ïa ka ophis treikam jong ka NHPC, lait noh na ki khubor ba la mih shaphang ka jingshah thombor ha ki bynta jong ka thanat pulit jong ka Pasighat. Hynriew tylli ki kali ki la shah thang, la iathuh ki tyllong khubor.
Kane ka jingkulmar ka la mih hadien ka jingkynnoh ba ki bor pahara ki la siat da ki bom tear gas sha ki nongkyrshan bandh ha Geku ha Upper Siang ha kaba saw ngut ki longkmie ki la mynsaw, ha ka Sngi Thohdieng.
Ka bynta jong ki nongiakhih ruh ki la don bynta ha ki jingiakhih bad ki la dawa ban pyllait noh ïa ki 10 ngut ki briew kiba la shah kem ha ka por ba ki iakhih pyrshah ïa ka projek dam heh. Ka jinglong jingman ka la nang jur hadien ba ki nongiakhih ki la pyndonkam da kaba siat maw bad thang ding. Ki bor pahara ki la hap ban pyndonkam da ka bor.
Ha katei ka sngi, la buh ïa ka pakhang shnong kaba 12 kynta ha kylleng ka Elaka Siang bad Upper Siang bad ki bynta jong ka East Siang, ka jingpyrshah ïa ka jingthmu jong ka sorkar Siang Upper Multipurpose Project (SUMP), ka dang iaid shakhmat. Ki katto katne ki seng pyrshah dam kiba la ialam da ka Adi Bane Kebang-United, ka Seng Samla ba shah ktah ha ka SUMP, ka Siang Indigenous Farmers Forum, bad ka Adi Galo Welfare Society ki la khot ban khang khyrdep.
Ia katei ka jingiakhih la pynlong namar ki jingdawa ban pynduh noh ïa katei ka projek bad ban weng noh ïa ki shipai na katei ka thain.
La ong ba ki pulit jong ka Arunachal ha Boleng, ki la hap ban siat da ka tdem pynsat khmat ban pynpra ïa ki nongiakhih pyrshah dam hajan Ditte Dime, ha shilynter ka lynti kaba leit sha Geku, ha ka sngi Palei. U SP u Siang Kamdam Sikom u la iathuh ba ki nongiakhih ki la kawang maw ïa ki pulit, hadien kata la siat da ki lyer pynsat khmat ban teh lakam ïa ka jinglong jingman. U la ong ba ka jingkhang dam ka dang iaid ha Boleng, katba ka jinglong jingman baroh kawei ha kylleng ka Elaka Siang ka dang long kaba shngaiñ.
La pynkhamti ha ka NHPC ban leh ïa kane ka projek ba la thmu ban leh ïa ka Upper Siang Multipurpose Project, kaba la mad ïa ka jingpyrshah kaba jur na ki nongshong shnong. Ka Siang Upper Multipurpose Project (SUMP) ka dei ka project kaba heh bha kaba la thmu ban pynmih bor ding bad buh um kaba don ha ka wah Siang ha ki distrik Upper Siang bad Siang, bad la ïohi ïa ka kum ka jubab jong ka India ïa ka dam heh jong ka China ha Yarlung Tsangpo ha Tibet. Ka Tsanpo ka kylla Siang ynda ka la rung sha Arunachal na China bad sharum ka kylla Bramhaputra.
